Ishin vitet 1999-2000. Ishte vapë si tani e unë kisha marrë pushimet verore në shkollë. Më kishte ftuar në shtepi një shoqja ime. Teksa po afrohej dreka, mamaja e shoqes time filloi të përgatiste drekën.
Ajo ishte një grua e bukur, me flokë të drejtë kaf në të verdhë, me një trup të hollë të gjatë. Atë dite mbante veshur një fund të gjatë dhe një bluzë pa mëngë.
Fliste pak por ëmbël. Kishte sy të zinj por njërin sy e kishte të nxirë keq dhe në krah kishte ca njolla ngjyrë blu. Me pat bërë çudi asokohe, unë isha veç 13 vjeç.
Kur dreka ishte gati, ajo na thirri po përsëri me zë të butë që të mblidheshim në tavolinë. Ne si dy 13 vjeçare, u ulëm duke qeshur dhe nuk pushonim së qeshuri. Në një moment mbaj mend një të gërsitur në tavolinë dhe u ngriva në vend!
U përpoqa të kuptoja çfarë ndodhi dhe shpejt kuptova që babai i shoqes kishte goditur me grusht tavolinën sepse ne po e bezdisnim. Shoqja ime kishte një shikim të frikësuar dhe u ngri në tavolinë. E ëma ndërhyri butë dhe i tha “burrit të shtëpisë”:-
– Lëri vajzat, janë të vogla, ato po kënaqen me njëra- tjetrën!
Ai i kapi dorën, ia shtrëngoi fort, derisa ajo në lot nxorri një zë plot dhimbje:
– Mos të lutem, më thyeve gishtin.
Në atë moment, mbaj mend që jam ngritur në kembë dhe i kam bërtitur atij burri katil:
– Lëshoje atë dhe mos guxo ta prekesh më me dorë!
Ai më pa i xhindosur dhe u çua dhe iku. Këmbët me janë dridhur për 1 orë rresht dhe kanë kaluar aq shume vite dhe unë se harroj atë moment. Shpejt kuptova që syrin zonjës ia kishte nxirë po ai dhe ajo ishte një viktimë që flinte në një shtrat me dhunuesin e saj!
Sa herë dëgjoj raste femicidi, kujtoj këtë ngjarje. Ka qenë ajo ditë që i kam bërë betim vetes se asnjë burrë në jetë s’ ka me guxu me më prekë me dorë mua apo ndonjë grua të familjes time. Betohem në Zot se nuk mbaj përgjegjësi në një rast të tillë!
Mos i prekni gratë, sepse vetëm një burrë i dobët, shumë i dobët godet një grua! Hapjani derën vajzave, ato janë bijat tuaja përpara se të jenë gratë e burrave.
Mësojini vajzave se janë të lira dhe se liria e jeta e tyre vlen më shumë se asgja! Dënojini me ftohtësi në gjykata konsumatorët e femicidit! Mos e falni kurrë një burrë që ju godet- ai do ta përsërisë sërish! /Nga Uarda ALBUNESA GJEKAJ, publikuar në Facebook/
