Me hidhërim të thellë mora lajmin e ndarjes nga jeta të mikut tim të dashur, Ndue Bacaj. Një njeri i rrallë, i mençur, i përkushtuar ndaj dijes dhe së vërtetës. Intelektual i ndershëm, publicist i palodhur dhe qytetar shembullor.
Kisha nderin dhe privilegjin që në vitin 2023 t’i dorëzoja titullin “Qytetar Nderi” i bashkisë Malësi e Madhe, një vlerësim i merituar për kontributin e tij të jashtëzakonshëm në ruajtjen dhe promovimin e historisë, kulturës dhe identitetit tonë.
Falë përkushtimit tij dhe dëshirës për të lartësuar gjithnjë Malësinë e Madhe, por edhe krejt kombin Shqiptar, ai nxori në dritë figura të shquara, ngjarje dhe të vërteta që nuk duhet të harrohen kurrë. Ai la pas 8 botime të rëndësishme, 19 dokumentarë televizivë, por edhe një mori shkrimesh publicistike.
Largimi i tij është një humbje e madhe jo vetëm për familjen e tij, por për krejt Malësinë, për komunitetin tonë, për publicistikën, për miqtë dhe kolegët që patën fatin ta njihnin dhe të punonin me të.
Trashëgimia e pasur që la pas, e bën Nduen të kujtohet përjetësisht. Ngushëllime të përzemërta familjes, miqve dhe atyre që ndajnë dhimbjen e kësaj humbjeje! U prehsh në paqe miku im! /Nga Tonin MARINAJ, publikuar në Facebook/
