Kënaqësi e nder i veçantë të prisja në UNISHK Monsinjor Angelo Massafra OFM dhe Dom Nikolin Toma. Përveç diskutimeve mbi rëndësinë e bashkëpunimit midis institucioneve sociale, ata dhuruan kopje të librit “Përmbledhje të doktrinës shoqërore të Kishës” për studentët e Fakultetit të Drejtësisë të UNISHK.
Falenderova Monsinjor Massafrën për vizitën dhe kontributin e tij në vite, duke nënvizuar rëndësinë e transparencës institucionale, përfshirjen aktive në jetën sociale të të gjitha institucioneve dhe përkushtimin ndaj vlerave të feve monoteiste, si: bamirësia, besnikëria dhe simpatia për njerëzit. Theksova gjithashtu rëndësinë e promovimit të bashkëjetesës ndërfetare në Shkodër, duke bërë të ditur se, pas kësaj vizite, kemi planifikuar të takohemi, sa më parë, edhe me Kryemyftiun e Shkodrës, mikun tim, z. Muhamed Sytari.
Takimi, po ashtu, simbolizon bashkëpunimin mes institucioneve fetare dhe atyre akademike, në funksion të zhvillimit të përbashkët kulturor dhe social të vendit. Libri i dhuruar prej tyre ka vlerë universale, për të gjithë të rinjtë, pavarësisht besimit fetar që mund t’u përkasin, pasi synon promovimin e një kulture solidariteti për një rend ekonomik që respekton të mirën e përbashket dhe në të cilin politikat e zhvillimit të kenë në thelb respektimin e dinjitetit dhe lirisë së çdo individi.
Më tej, shtova se, Shqipëria është një shoqëri tipike multufetare dhe në shoqëri të tilla pluraliste, fetë marrin formën specifike të denominacionit, që do të thotë se ata mbajnë dhe ruajnë marrëdhënie miqësore e shoqërore me njëra tjetrën, me institucionet e shtetit dhe se asnjëra prej tyre nuk pretendon të jetë i vetmi besim fetar i kombit. /Nga Tonin GJURAJ, rektor i UNISHK/
