NGA ROMEO GURAKUQI – Në Shkodër nuk ka plane të vërteta dhe komplekse për të zgjidhë problemet e krijueme nga vitet

Pasojë e parë e drejtpërdrejtë e shuarjes së Institutit të Arkeologjisë/ ASA (nga ku kalonte deri më tani proceduralisht aplikimi për leje ndërtimi në zonat historike dhe arkeologjike): rrethimi dhe fillimi i punimeve në Zonen e Parë të Mbrojtur të Monumenteve të Kulturës rreth Kalasë së Shkodrës.

Ligji shqiptar nuk lejon as Komitetin Kombëtar të Mbrojtjes dhe Rregullimit të Territorit të japë leje në këtë zonë ku gjendet pasuria monumentale, Prehistorike, Antike dhe Mesjetare e Shkodrës. Përgatitje për betonim vrastar të murit rrethues të Epokës Romake, dhera të hedhuna mbi shtratin e Bunës, një mase teneqeje vrastare e vendosur në hyrje të Urës së vjetër të Bunes, bri tyre ujërat e zeza vërshojnë si një përrua i pandërprerë në lum, pamja më e shemtuar e mungesës së funksioninit të institucioneve lokale dhe qendrore në Shkodër, fikjes së Zërit të Përfaqësisë, qorrimi i organeve ligjzbatuese, demoralizimit dhe lodhjes së qytetarisë para babëzisë që nuk ka limite arsyeje dhe fytyre.

Në Shkodër fillohet sërish puna me një copë betoni dhe zhavorri mbi Bunë, të kaluar me ngut në një “tender të ndershëm” në ditë kaosi pushtetor, në vend që të bekohet starti me një plan të plotë dhe të mirëmenduar të lirimit të rrjedhës së lumit, zgjidhjes së problemit të filtrimit të ujrave të zeza që derdh qyteti, lagjet perferike dhe lokalet në atë shtrat fillestar ku ngjizet jeta e hapet mushkëria e Labiatisë.

E fundit por jo me pak e rëndësishme: ndërtohet molo në një vend ku nuk ka qenë kurrë, ndërkohë që vazhdohet të heshtet dhe të mos i jepet zgjidhje masës se madhe të zhavorrit që është futur si hundë para pedonales së lungofiumes, duke e bërë jofunksionale molon e vjetër.

Pra, në Shkodër dhe për Shkodrën, nuk ka plane të vërteta dhe komplekse për të zgjidhë problemet e krijueme nga vitet e mos investimeve për hyrjen e qytetit. Ka vetëm copëza projektesh të sajuara me padijeni për vendin, pikat e shenuara të historisë së vjetër dhe të re.

A ekziston mundësia, që para se kamionet të futen tinëzisht me hedh zhavorr mbi Bunë, të mblidhen ca njerëz që e njohin dhe e duan Shkodrën, të mbetur ende në këtë qytet, për me kuvendu mbi vendimarrjet dhe radhën e punëve?! /Nga Romeo GURAKUQI, publikuar në Facebook/