Kur njeriu mbush 18 vjeç, bashkë me pjekurinë që i jep mosha shoqëria i ka dhënë të drejtën e votës. Kjo e drejtë është si një kasafortë magjike që fsheh brenda saj votën, por jo vetëm, sepse vota nuk është vetëm një e drejtë për tu ushtruar, por ajo përmbledh në vetvete karakterin tonë, dinjitetin, ndershmërinë, seriozitetin, moralin njerëzor, dashurinë për veten, familjen e qytetin e vendin ku jemi lindur dhe rritur.
Tek ajo kuti fshihen andrrat dhe dëshirat për jetën dhe mirëqënien, brenda saj është “mekanizmi” që ndan të mirën nga e keqja. Në fund të fundit, është mjeti dhe fuqia jote për të shprehur vetëdijen tënde qytetare, mundësia për të vendosur mbi të ardhmen.
Pikërisht, në momentin kur të jepet kjo e drejtë me zgjedhë njerëzit e duhur me na qeverisë, të arrish në atë shkallë sa ta shpërdorosh votën duke e shitur, apo edhe më keq, duke e blerë apo patronazhuar të tjerët, duke u bërë aktorë e ndihmës që të intimidohet dhe tjetërsohet vota e jonë dhe e tjetrit, jo vetëm që kemi treguar se nuk kemi të bëjmë fare me qytetarinë dhe përgjegjësinë që kemi së pari ndaj vetes dhe ndaj të tjerëve.
Mirëfilli është një krim, madje ndër më të shëmtuarit, sepse nuk ke shitur një copë letër, por ke shitur dinjitetin dhe shpirtin.
Për fat të keq, këto ditë qemë dëshmitarë se “vrasësit” e votës i patëm të shumtë dhe gjithandej. Në një lloj mënyre po jetojmë vdekjen morale të një shoqërie të tërë, edhe pse letra në shtyllë ende nuk i ka dalë. /Nga Qashif HOXHA, nënkryetar i PD Shkodër, publikuar në Facebook/
