A duhet të kishte reaguar ndonjë institucion? A duhet të kishte dalë një zë nga shteti për të qetësuar situatën? Sepse ajo që po ndodh në Rrjoll nuk është më vetëm një konflikt për tokën. Është një provë për shtetin dhe drejtësinë në Shqipëri.
Banorët e Baks-Rrjollit po përballen prej javësh me tension, polici, arrestime dhe presion në tokën ku kanë jetuar me breza. Në vend që të ketë dialog dhe sqarim, ka heshtje. Në vend që të ketë transparencë, ka përplasje. Dhe këtu lind pyetja më e rëndë:
Ku janë institucionet?
Ku është Ministria e Drejtësisë?
Ku është hetimi për çdo tejkalim kompetence?
Ku është zëri i shtetit për të shmangur përplasjen?
Sot duhet edhe t’i falënderojmë Zotit që banorët, edhe pse e ndiejnë hasmin në derë dhe padrejtësinë mbi kokë, deri tani kanë treguar maturi dhe përmbajtje. Sepse në një situatë kaq të tensionuar, një shkëndijë e vogël mund të kthehet në tragjedi.
Historia na ka mësuar një gjë të thjeshtë: kur shtypja vazhdon dhe drejtësia hesht, tensioni rritet. Prandaj kjo është një thirrje për ndërgjegje:
Reagoni sa nuk është vonë.
Hapni dialogun.
Sqaroni ligjin.
Respektoni qytetarin.
Sepse kur qytetari ndjen se shteti nuk e dëgjon, shoqëria hyn në rrugë të rrezikshme. Rrjolli nuk duhet të bëhet një plagë tjetër për Shqipërinë. Drejtësia duhet të flasë para se të flasë tragjedia. /Nga Paulin MACAJ, dërguar për publikim në ShkodraWeb/
