Të dashur bashkëqytetarë,
Sot po ju drejtohem me dhimbje, por me një vendosmëri të palëkundur për atë që po ndodh në Rrjoll të Velipojës. Një zonë që për breza ka jetuar në harresë, pa rrugë e pa shtet, ku shkohej me varkë e me mushkë, sot po bëhet papritur “strategjike” vetëm sepse iu zbulua vlera ekonomike. Dhe bashkë me këtë “zbulim”, po rrezikon të zhduket pronari autokton nga toka e vet.
Mos e quani zhvillim zhdukjen e pronarit nga trualli i tij. Zhvillim nuk është kur largohen të trishtuarit dhe afrohen të fuqishmit. Zhvillim nuk është kur humbet identiteti dhe ngrihet antivlera.
Kur i merret toka atij që e ka trashëguar me breza, kur e ndershmja shtypet e e mbrapshta nderohet, kur pushteti mbron të fortin e jo të drejtin – kjo nuk është përparim, por rrënim moral.
Drejtësia e kthyer në barrikadë
Është alarmante kur qytetari ndjen se institucionet që duhet ta mbrojnë, po i dalin përballë. Besimi tek shteti nuk mbahet me fjalë, por me drejtësi të dukshme dhe të barabartë. Kur qytetarët shohin standarde të dyfishta, kur ndihen të pambrojtur në oborrin e shtëpisë së tyre, atëherë lëkundet themeli i vetë shtetit. Historia jonë e afërt ka treguar se kur padrejtësia grumbullohet, pasojat janë të rënda. Asnjë shoqëri nuk fiton nga tensioni, nga dëshpërimi, apo nga ndjenja se dera e drejtësisë është e mbyllur.
Alarm për ndërgjegjen publike
Rrjolli nuk është thjesht një çështje prone. Është çështje dinjiteti. Bregdeti nga Buna deri në Bregmatë është amanet brezash. Identiteti nuk ndërtohet duke zhvendosur të zotin e shtëpisë. Banorët po ndjekin rrugët ligjore. Po kërkojnë përgjigje institucionale. Po kërkojnë transparencë. Kjo është rruga e duhur dhe e vetmja rrugë në një shtet demokratik. Por heshtja përballë një shqetësimi kaq të madh nuk është zgjidhje.
Thirrje institucioneve
Policia është për qytetarin. Deputetët janë për popullin. Qeveria është për barazinë para ligjit. Forca e shtetit nuk matet me fadroma, por me drejtësi. Zhvillimi i vërtetë ndërtohet me dakordësi, transparencë dhe respekt për pronën e trashëguar.
Sot është moment reflektimi. Sepse kur shtypet i ndershmi, lëkundet vetë themeli i shtetit. Dhe kur humbet identiteti, humbet vetë kombi. Mos e çoni këtë çështje drejt përplasjes. Zgjidhja është dialogu, ligji dhe drejtësia e paanshme. Historia gjykon më ashpër se çdo gjykatë. Një qytetar i shqetësuar kur sheh trishtim dhe padrejtësi! /Nga Paulin MACAJ, dërguar për publikim në ShkodraWeb/
