Ka momente në jetë kur mënyra si vepron flet më shumë sesa çdo titull që mban. Kam mbajtur përgjegjësi të rëndësishme institucionale dhe politike në Shkodër, në një periudhë kur u ndërtuan besime dhe u morën vendime që hapën rrugën për drejtimin e sotëm të bashkisë. Kontributi im në atë proces nuk është rastësi dhe as i harrueshëm.
Për dy vite me radhë nuk pati asnjë mundësi, asnjë vlerësim, pavarësisht përvojës dhe angazhimit tim. Sot erdhi një ofertë e vonuar, që nuk reflektonte sakrificën, përgjegjësinë dhe punën e bërë ndër vite. Nuk është naivitet ta kuptosh se ajo ofertë nuk kishte të bënte me njohjen e kontributit, por me krijimin e një perceptimi.
Unë kam zgjedhur gjithmonë të eci me dinjitet dhe pa zhurmë. Nuk lejoj që vendime të pamenduara apo antivlera personale të përcaktojnë vlerën time profesionale dhe njerëzore.Unë zgjedh të vazhdoj të kontribuoj për Partinë Socialiste, për Shkodrën dhe për Edi Ramën, sepse besoj se partia nuk janë emrat dhe as të emëruarit, por vlerat që na bashkojnë dhe përgjegjësia ndaj njerëzve.
Kjo nuk është një çështje postesh. Është një çështje parimesh. /Nga Mirela DODAJ, ish- bashkëkryetare e PS- së Shkodër, publikuar në Facebook/
