Ministri i Brendshëm, Besfort Lamallari, ka reaguar në lidhje me sulmin e ndodhur natën e të shtunës nga disa protestues të maskuar në ambientet e Komisariatit numër 3. Ai tha se kjo është pasojë e lajmeve të rreme dhe benzinës që i hedhin moralistët, kritikët, delirantët revolucionare etj., etj.
Unë jam kundër çdo forme dhune, aq më shumë ndaj institucioneve si zyrat e policisë. Por Ministri i Brendshëm nuk mund të flasë si një përfaqësues politik. Ai duhet mbajë përgjegjësi:
-Si është e mundur që protestuesit hynë në mjediset e komisariatit pa asnjë pengesë?
-Si është e mundur që një komisariat që është edhe “Burgu 326”, ku mbahet shumë të burgosur e të paraburgosur, bastistet me lehtësinë e një mulliri fshati
-A janë identifikuar dhe ndaluar dhunuesit?
-Ku ishin policët me gaz lotsjellës e spray djegës që tre ditë më përpara kishin mbushur xhepat me bobola dhe ua lëshonin protestuesve para Kuvendit, pa u afruar as tek gardhi i institucionit?
-Përse të enjten komisariati ishte braktisur dhe nuk kishte këmbë polici (videoja e një aktivisti e tregonte këtë).
Do të ishte e frikshme të mendonin se këto janë skenarë për ta futur turmën në të tilla aventura të rrezikshme, jo për protestën, por për stabilitetin. Nuk di ku ke qenë në mars 1997, kur u sulmuan komisariatet e u hapën burgjet, por mua më dridhen ende këmbët nga ç’kam parë e përjetuar.
Ndaj merrni përsipër përgjegjësinë e ruajtjes së institucioneve, sepse turma turmë është dhe, edhe pa nxitje, dhuna mund të bëhet një lloj sporti, që po filloi të luhet, nuk dihet kur mbaron e çfarë pasojash prodhon. /Nga Mentor KIKIA, publikuar në Facebook/
