Qysh 12 vjeçe kam nisë me i shërbye miqve dhe vazhdoj edhe sot te bujtina jonë familjare, pa turp, por me dinjitet e me knaqësi. Ti, Aron, e nxore në dritë nji realitet të dhimbshëm: aty ku nji pakicë burracakësh hala në kyt vend, përçmojnë ma të dobtin, ma të vorfnin, apo atë që t’shërben.
Reagimi i fortë i opinionit publik asht shpresë, por na duhet me folë edhe ma shumë, që institucionet me veprue si duhet. Jam e bindun se ka edhe raste tjera, por reagimi shembullor sot duhet me i tregu çdo maskarai se askush s’asht mbi ligjin.
Unë i di turnet e gjata, tavolinat e shumta e klientat e padurueshëm e lodhjen e stërgjatë të sezonit. Ndërkohë me kulturë e plot fisnikeri ju përgjigje nji akti dhune që duhet t’ jetë e patolerueshme n’ shoqnin tonë.
Trauma jote, psikologjike e fizike, s’ka me shkue kot. Asht si nji flijim që ka me dhanë kontribut për me e ba këtë vend pak ma të drejtë. Uroj me zemër që drejtësia të japi vendimin e duhun për këtë rast! Na fal Aron Balaj, falemners Aron Balaj! /Nga Marjana KOÇEKU, Neomalsore, publikuar në Facebook/
