Të dashur miq, të nderuar banorë të qarkut të Shkodrës!
Fjala e parë që më vjen në mendje teksa shkruaj këto rreshta, është Mirënjohje! Që nga dita e parë që mu besua drejtimi i Qarkut të Shkodrës, e konsiderova privilegj dhe nder, njëkohësisht përgjegjësi e madhe për të mbajtur lart vlerat tradicionale por edhe të këtyre 35 viteve, të mbrujtura dhe të ruajtura me shumë sakrifica nga breza të tërë.
Pa nisur askund fushata, gjatë saj e pas saj, u përballëm me presione, agresione verbale, intimidime, përdorim të punonjësve e strukturave të shtetit në të gjitha nivelet e tij. Ne nuk kishim përballë një subjekt politik por një monstër elektorale, e cila vetëm pamjen kishte të njeriut. Megjithatë, bashkë me ju, të gjithë bashkë, në Shkodër, Malësi të Madhe, Vau Dejës, Pukë e Fushë Arrëz rezistuam dhe fituam.
Gjatë ditëve të kësaj fushate kam takuar nga afër, kam bashkëbiseduar me qindra, mijëra banorë në të gjithë qarkun. Prej tyre, ditë pas dite, mora dhe konsolidova bindjen, forcën, vendosmësinë dhe guximin, vlera që i gjeta të përmbledhura tek çdo person, grua, burrë, i ri, e re, i moshuar e deri tek fëmijët. Falenderimi është shumë pak për të gjithë ju!
Përtej situatave aspak të lehta të krijuara nga pushteti me të gjitha format dhe mënyrat nga viti 2021 e deri më sot, demokratët, mbështetësit e simpatizantët tanë, ishin aty si përherë, të vendosur për të ecur përpara drejt fitores së përbashkët. Qytetarët shkodranë, të të gjitha moshave, kuptuan mesazhin tonë, programin tonë dhe shpërndanë dritën e shpresës si pishtarë drite.
Ekipi ynë, me të cilin çdo ditë përballuam sfida nga më të vështirat, më të parashikueshmet e më të papritura, meriton vlerësimin dhe falënderimin tim më të sinqertë.
Shkodra tregoi shpirtin e saj, papërkulshmërinë e vet përballë çdo të keqeje, pavarësisht përmasave të saj dhe që tashmë prej 12 vitesh, identifikohen si keqqeverisje nga një narkoshtet, të drejtuar nga një dhunues- uzurpator i votës së lirë me emrin Edi Rama!
Unë e kam për nder dhe privilegj të jem përfaqësuesi i Shkodrës në legjislativ. Do të vë në shërbim të këtij përfaqësimi, të gjithë dijet, njohuritë politike e jetësore, forcat individuale për të merituar çdo minutë besimin tuaj për të qenë një zë i fortë dhe shërbëtor i përkushtuar i interesave të Shkodrës e shkodranëve, në çdo rrethanë.
Të dashur miq!
E di, që shumicës nga ju, për shkak të asaj masakre elektorale që regjimi realizoi me 11 maj 2025 në të gjithë Shqipërinë, këto rreshta mirënjohje dhe falënderimi nuk ua ndryshojnë gjendjen shiprtëtore. Sigurisht, keni të drejtë! Jam i ndërgjegjshëm që duhet të vazhdojmë luftën tonë, përpjekjet tona, pavarësisht një betejë të humbur.
Shkodra, më mirë dhe më shumë se askush, e di sa e vështirë është rruga për ndërtimin e demokracisë, sa mund e sakrifica duhen kaluar për të garantuar ato vlera, për të cilat breza të tërë nuk kursyen asgjë. E pikërisht nga Shkodra, mesazhi i shpresës u shpërnda i gjallë dhe nga Shkodra, mesazhi i reagimit dhe ringritjes së shpejtë, duhet të përhapet në të gjithë vendin.
Këto pak rreshta, janë detyrimi minimal për të shprehur mirënjohjen e falënderimin tim për të gjithë ju. Por ditë pas dite, javë pas jave, do të takohemi sërish me njëri- tjetrin, si pjestarë të një fryme, e cila nga Shkodra, do të përfshijë të gjithë Shqipërinë. Nuk ka asnjë forcë që mund të na ndalojë, që mund të ndal këtë uragan të shpirtrave dhe zemrave të lira!
MIRËNJOHJE dhe FALEMINDERIT!
Mirëutakofshim së shpejti!
Luçiano Boçi /Publikuar në Facebook/
