AKADEMIA MAOISTE E SHQIPËRISË EUROPIANE
Kur Akademia e Shkencave shkruan sot deklaratë publike mbi dorëheqjen e një deputeti nga punët e tij në një komision (ç’punë ka Akademia me punët e një deputeti?!), kur Akademia e Shkencave “kundërzbulon” sot deputetët diversantë brenda shumicës socialiste, dhe i “demaskon” ata përmes po asaj deklarate publike, kur Akademia e Shkencave “i çjerr maskën” sot të vetmit (siç thotë ajo) “agjent” në radhët e shtrënguara të saj, i cili, siç deklaron po vetë ajo, veproka veç në emër të interesit vetjak duke shkelur interesin e përgjithshëm të progresit të shkencës, kur bëhet publike e gjithë kjo nga vetë Akademia e Shkencave, atëherë çdokush e ka të qartë se shkenca zyrtare në Shqipëri ka hyrë sërish në petkat e Revolucionit Kulturor Kinez.
Si gjuhëtare u zbavita duke parë hartuesin e vërtetë të kësaj deklarate. Nisur nga gjuha puniste me të cilën është shkruar, s’ka dyshim se hartuesi i saj është vetë Kryetari i ASH. Thjesht ia kanë drejtshkrimuar redaktorët e tij, ngaqë Kryetari e ka dëshmuar se nuk di ta përdorë drejtshkrimin.
Dy pyetje dua t’i shtroj me ngulm opinionit publik pas kësaj deklarate të Akademisë:
1. Çfarë ka ndryshuar në vitin 2023 te Gjinushi politik, kur ai në deklaratën e vet të sotme shkruan se: “alibia e stisur e pakicës, që, meqenëse kryetari aktual vjen së fundi nga politika, rrezikon të politizohet institucioni, mund të gjente njëfarë justifikimi në vitin 2019, por jo në vitin 2023”?
2. Pse mandatti i dytë i paligjshëm i Gjinushit qenka garanci për pavarësinë e Akademisë së Shkencave?
Ndërkohë vijoj të them se asnjë shqetësim nuk po ka Akademia për çështje me rëndësi kombëtare si zjarret, ekosistemi, shpopullimi, publikja etj etj etj.
As edhe një! Ama i lejon vetes të gjykojë publikisht deputetin dhe deputetët, t’i përligjë ose t’i delegjitimojë e madje edhe t’i demaskojë të pabindurit ndaj saj. Shkencë pra! /Nga Ledi SHAMKU SHKRELI, publikuar në Facebook/
