Të dhënat e CENS-it treguan se në 12 vitet e fundit në Qarkun Shkodër janë larguar 60,868 qytetarë, ku vetëm në Bashkinë Shkodër janë larguar 33,178 qytetarë.
Shpopullimi masiv që po i ndodh veriut dhe veçanërisht Bashkisë Shkodër është si pasojë e staniacionit ekonomik që ka kjo krahinë. Mjafton të ballafaqojmë statistikat dhe disa faktorë ekonomiko-social për të kuptuar se çfarë e ka nxitur këtë shpopullim. Sipas të dhënave të marra nga “Vjetari Statistikor Rajonal” i vitit 2023 nga INSTAT:
Paga mesatare në vitin 2022, përllogaritej 49,711 lekë, duke rezultuar si niveli më i ulët i pagës në rang kombëtar. Krahasimisht paga minimale për të njëjtën periudhë shënonte 34,000 lekë.
Shpenzimet mesatare mujore për konsumin bazë për një familje në vitin 2022 përllogariteshin 83,014 lekë. Referuar pagës mesatare të përllogaritur, shpezimet për konsum përbëjnë afërsisht 83.5% të të ardhurave mesatare në një familje.
Shkodra ndan tre vendet e fundit me Kukësin dhe Lezhën për nivelin më të ulët të PBB për person, duke dëshmuar gangrenën ekonomike të rajonit.
Referuar standartit të jetesës rezulton se 66.9% e popullsisë rezultojnë se ngrohin banesat e tyre me dru zjarri e qymyr.
Në vitin 2022, 66.8% e krimeve rezultojnë “krim kundër personit” duke shënuar nivelin më të lartë të krimit kundër personit në rang kombëtar dhe duke dëshmuar një nivel të lartë kriminaliteti.
Shpopullimi sot lidhet me mungesën e theksuar të konkurrencës së ndershme, meritokracisë, të standartit të jetesës, korrupsionit të përhapur në të gjitha nivelet e pushtetit dhe mbi të gjitha si pasojë e mungesës së një tregu të pakriminalizuar.
Shpopullimi i këtij rajoni do të nis të frenohet, kur të rritet në mënyrë eksponenciale niveli i pagave, të afrohen investitorë dhe kompani të mëdha serioze që premtojnë hapjen e vendeve të punës dhe profileve të reja me paga konkuruese, si dhe mbi të gjitha kur të punohet në rritjen e mirqënies dhe sigurisë së qytetarëve.
