Prele Milani, njeriu që dikur i shkruante letër Komitetit të Partisë nga karroceria e një makine që lëvizte nga Shoshi drejt Shkodrës, duke i treguar se bashkë me një grua shtatzënë në koma, në karroceri ishin të shtrirë edhe një lopë, dy viça e disa derrkucë, sot është shkarkuar nga puna.
Shkrimtari, poeti, publicisti dhe studiuesi nga Dukagjini, që mban veshur edhe uniformën e Policisë së Shtetit, një rast i rrallë brenda këtij institucioni, prej kësaj të shtune nuk është më Nënkomisar.
Faji i tij? Një analizë e thjeshtë në rrjetet sociale. Një thirrje për bashkim dhe përfaqësim të popullit më të varfër të Shqipërisë: Dukagjinit. Pa flamuj partie, pa interesa personale, me një mendim të kthjellët e të ndershëm, Prela i ftonte bashkëmalësorët që këtë herë të mos përsërisnin gabimet e së shkuarës. Të mos bashkoheshin as për PS-në, as për PD-në, por për Dukagjinin — për të ardhmen e tyre.
Në shkrimin e tij, Prela ngriti shqetësimin për një entuziazëm të çuditshëm: një zonë që për dekada kishte mbetur pa përfaqësim në Kuvend, sot rendit 13-14 kandidatë për deputetë. Edhe pse dy mandate duken të sigurta, paralajmërimi i tij ishte i qartë: mos harroni hallet, problemet dhe mungesën e shpresës për Dukagjinin por të kërkojmë investime.
Për Policinë e Shtetit, ky reflektim ishte “cenim i rëndë” i figurës së punonjësit të policisë. Dhe dënimi erdhi shpejt.
Prela u ndëshkua për një mendim. U ndëshkua pse guxoi të ftonte për bashkim e ndërgjegjësim. Sepse në Shqipëri, të jesh polic që mendon si të ndihmosh popullin, shkruan dhe kërkon ndryshim, është “krim”; ndërsa të jesh polic qe mendon si të ndihmosh krimin, vlerësohesh moralisht dhe shpërblehesh financiarisht.
Pavarësisht “gabimit” dhe pezullimit nga detyra, besoj se Prela do të rikthehet. Me formimin e tij, me qytetarinë dhe fisnikërinë që e karakterizojnë, ai i bën nder Policisë së Shtetit. /Nga Klodian ZHIVANI, publikuar në Facebook/
