Kthehem nga Shkodra me një eksperiencë të re super pozitive, nuk thonë kot, sa do rrosh do mësosh… I ftuar nga drejtoresha e Qëndrës Kulturore për fëmijë Shkodër, Orjeta Kelaj, mora pjesë në jurinë e festivalit të madh të talentit Shkodran “Bilbilat e Shkodrës këndojnë”, sëbashku me profesionistë të mirëfilltë si Zef Çoba, Ilir Zoga e Mimoza Rakaj.
Kisha kohë që nuk kisha dëgjuar kaq talente të vegjël mbledhur së bashku, kisha kohë që nuk kisha dëgjuar një nr të madh koresh fëmijësh nga shkollat e qytetit të konkuronin sëbashku, kisha kohë që nuk kisha menduar kaq shumë…
Në një kohë që në Tiranë merren lek (dhe jo pak) nga institucione e sponsor për konkurse e festivale fëmijësh shumë herë pa nivel e shumë herë të tjera organizohen festivale ku prindër pafund kujtojnë se paguajnë kompozitor por në fakt paguajnë Robotët e IA, në Shkodër vetëm një qëndër kulturore e qytetit arrin të mbledhë më shumë se 500 fëmijë, nga të cilët pjesa më e madhe me nivel shumë të lartë artistik e interpretativ. Me gjithë çmimet e shumta që ndamë si juri e këtij konkursi me siguri e them që ishte jashtë mase e vështirë të linim jashtë çmimeve shumë talente të tjerë. Ndaj mendoj që ka ardhur koha të kthejmë sytë edhe jashtë mureve të kryeqytetit.
Jam pa fjalë nga ky organizim magjik, nga puna e shkëlqyer e Orjeta Kelaj, nga përkushtimi dinjitoz i pedagogëve që përgatisin këto talente si dhe një falenderim i veçantë për të gjitha familjet Shkodrane që mbajnë në gjirin e tyre thesare të tilla.
Për sa më përket mua si Gjergj, tashmë kam bërë zgjedhjet e mia për shumë nga talentet që dëgjova për ti afruar e promovuar në aktivitetet kryesore që unë e stafi im organizojmë. Mes tyre nuk janë thjesht ato që morën çmimet e festivalit por edhe të tjerë që nuk arritëm dot ti vlerësonim me çmime. Në fund të fundit një diplomë e dhënë nuk është gjithçka por është skena dhe promovimi real ajo që çdo talent ka nevoj. Edhe njëherë faleminderit Orjeta që më dhe mundësinë të mbushesha kaq shumë shpirtërisht me këtë spektakël magjik. /Nga Gjergj LEKA, publikuar në Facebook/
