Paska dalë Partia Socialiste me nji deklaratë, me gjuhë që ma shumë të kujton lajmet e mbramjes në TVSH- në e kohës së qoftëlargut, se nji reagim serioz. Plot me “bosht reformash” dhe batuta të vjetra që na e kujtojnë foltoren ku kruhej hunda e bërtitej “fillimi i RII…”. Çka i ka pengue kësaj here? Nji djalë me kostum. Po, Tedi Kopliku, kandidat i Partisë Demokratike, i ri, serioz, përfaqësues i rinisë shkodrane. E çka bani ky që doli me kostum, në diell, në Shkodër. A thua duhet me dalë me rroba banjoje në konferencë, apo, edhe ma mirë, nudo si udhëheqësi suprem që ka për zakon me zhvesh institucionet nga çdo përgjegjësi? Alamet diskursi politik kritika e kostumit!
E pra, ky “kostum” që sot ju pengon, është ai që i hoqi shqiptarëve vizat dhe i futi në Europë. Ky “kostum” që ju e përqeshni, futi Shqipninë në NATO, ngriti Rrugën e Kombit, shpëtoi vendin nga kriza energjetike dhe ngriti universitetet. Ky “kostum” uli taksat, hapi vende pune dhe çoi vendin drejt ekonomisë së tregut të lirë. E nuk i bani këto as nudo, as me poza në TikTok, por me vizion, me punë dhe po, me kollare.
Tedi nuk asht me pushime, si turistat e përhershëm politik. Ai është kthye me jetu në Shkodër, e për këtë s’ka kërku leje as prej PS-së, as prej kryeministrit. Por si çdo i ri që e do këtë qytet, ka kërku diçka tjetër: llogari. E pikërisht për këtë, ju djeg.
Tedi denoncoi një nga mashtrimet më të mëdha të radhës: skemën e granteve për të rinjtë. Nga 56 milionë lekë të premtuara për start-up-e në 2024, janë disbursuar veç 7 milionë. Dhe kush i mori? Jo më të mirët, jo ata me ide, por ata me teserë partie dhe lidhje patronazhi. Në një Shkodër ku janë larguar mbi 32 mijë qytetarë në 10 vjet, 70% të rinj, PS ka guximin me folë për transparencë me flamur propagandistik në dorë.
E ndërkohë që lavdërohen për projekte për të rinjtë, harrojnë me përmend faktin që investimet reale për rininë në Shkodër janë ba nga Bashkia në kohën kur e drejtonte PD-ja. Qendra Rinore “Atelie” – e para funksionale në Shqipëri, jo për dekor, por për punë konkrete me në vit 365 aktivitete! Qendrat Komunitare “Për Familjen” – ku të rinjtë në nevoj janë përfshi në edukim dhe formim dhe janë asistuar duke u bazu në nevojat e tyre. 1,700 aktivitete për të rinj vetëm në 1 vit (2022), nga kultura te sporti, nga trajnime te ndërgjegjësimi. 23 ekipe sportive dhe mbi 450 sportistë të mbështetur direkt nga Bashkia, pa fonde nga ministritë që s’duken kurrë.
Tedi nuk ka ardhë me kërku grant. Ai ka ardhë me kërku llogari. Edhe për këtë nuk keni përgjigje. Vetëm fjalë, batuta dhe tallava në sfond të mitingjeve ku të rinjtë duhen veç për dekor. Shkodra nuk ha ma lugë bosh. As me grante, as me propaganda, as me “të rinj të përzgjedhun”!
E për fund, kujtojeni mirë: nuk jeni bankë që mbyll gojën me financime. Jeni institucion publik, e për këtë, do të jepni llogari. Jo vetëm para Tedit, por para çdo të riu që kërkon llogari. /Nga Engjëll GJUGJA/
