Për veriun, Shkodrën, Lezhën dhe gjithë zonat përreth, është një moment i gëzueshëm shpallja e fituesit për nisjen e ndërtimit të rrugës së shumëpritur Milot–Balldren.
Për vite me radhë është folur për Milot–Balldren. Është premtuar, diskutuar, komentuar dhe jo rrallëherë është parë me skepticizëm nga qytetarët e veriut, që kanë pritur gjatë për këtë investim jetik.
Sot, me shpalljen e fituesit, ky projekt hyn më në fund në fazën më të rëndësishme: realizimin.
Ky nuk është thjesht një segment rrugor. Është një arterie zhvillimi për Shkodrën, Lezhën dhe gjithë veriun e Shqipërisë. Është më shumë siguri në lëvizje, më pak kohë në rrugë, më shumë mundësi për biznesin, turizmin dhe ekonominë e rajonit.
Por po aq i rëndësishëm sa nisja e këtij projekti është edhe vazhdimi i tij deri në Shkodër. Për të gjithë veriun, kjo rrugë duhet të vazhdojë e plotë shumë shpejt deri në pjesën nën Shkodër, si një domosdoshmëri strategjike për zhvillimin e rajonit dhe integrimin e tij në Korridorin Adriatiko-Jonian.
Sot është një hap i rëndësishëm përpara. Jam i sigurt që ky projekt do të ecë me ritmet dhe standardet që meritojnë banorët e veriut dhe, në mënyrë të veçantë, Shkodra. /Nga Benet BECI, publikuar në Facebook/
