E nderuar Znj. Zëvendëskryeministre Balluku,
I nderuar z. Aliu, Ministër i Qeverisë së Republikës së Kosovës,
I Nderuar z. Malaj, Minister i Financave,
I nderuar z. Gjini, Kryetar i Komunës së Gjakovës,
Të nderuar kolegë profesionistë dhe qytetarë të Shkodrës,
Sot është një ditë e shënuar për të gjithë qarkun e Shkodrës, për veriun e Shqipërisë dhe për Gjakovën e Rrafshin e Dukagjinit. Jemi mbledhur për të diskutuar një nga projektet më madhore të kombit shqiptar – ndërtimin e Hekurudhës Kuqezi, një lidhje moderne hekurudhore midis Shqipërisë dhe Kosovës përmes ndërtimit të një segmenti krejtësisht të ri Shkodër–Gjakovë.
Ky është, pa dyshim, një ndër projektet më strategjike për Shkodrën dhe për lidhjen e saj të drejtpërdrejtë me Gjakovën e gjithë Kosovën. Një ëndërr shumëdekadëshe po bëhet realitet – një lidhje e vërtetë historike, kulturore dhe ekonomike për shqiptarët në të dy anët e kufirit.
Dua të falënderoj të dy qeveritë për vullnetin dhe vendosmërinë e treguar për ndërtimin e kësaj hekurudhe dhe për vendimin që traseja të kalojë përmes Shkodrës, në luginën e Kirit, më pas përgjatë Drinit, për t’u lidhur me Tropojën, Gjakovën dhe gjithë Kosovën.
Për fat të keq, në të kaluarën, Shkodra u anashkalua në projektin e autostradës së kombit. Por sot, falë vizionit të qeverive aktuale të Shqipërisë dhe Kosovës, hekurudha do të kalojë mes për mes qarkut të Shkodrës. Kjo është një nga vendimet më strategjike për dekadat që vijnë dhe e vendos Shkodrën në kryqëzimin e dy linjave hekurudhore ndërkombëtare – drejt Malit të Zi dhe drejt Kosovës – duke e lidhur kështu drejtpërdrejt me rrjetin evropian hekurudhor.
Kjo është një mundësi e jashtëzakonshme për zhvillimin ekonomik të rajonit – Shkodra mund të shndërrohet në një nyje të rëndësishme logjistike, infrastrukturore dhe qendër prodhimi e eksporti.
Në të njëjtën kohë, kjo pozitë e re i jep jetë potencialit të jashtëzakonshëm turistik: nga bregdeti i Adriatikut dhe liqeni i Shkodrës, te trashëgimia kulturore e qyteteve tona dhe bukuritë e pakrahasueshme të Alpeve shqiptare.
Segmenti 100 km Shkodër–Gjakovë do të jetë një vepër inxhinierike madhështore, me 35 kilometra tunele dhe 43 ura, dhe do të përshkohet në pak më shumë se një orë, me 7 stacione përgjatë rrugës.
Me rëndësi të veçantë është edhe nisja këtë vit e investimit në hekurudhën Vorë–Shkodër–Han i Hotit, që, bashkë me Autostradën Adriatiko–Joniane me financim europian, do ta pozicionojnë Shkodrën si një nga pikat më të favorshme zhvillimi në rajon deri në vitin 2030.
Faleminderit të gjithëve për angazhimin, dhe suksese në këtë sfidë të bukur infrastrukturore – ndoshta më të rëndësishmen për shqiptarët në vitet që vijnë. /Fjala e kryetarit të Bashkisë Shkodër, Benet Beci, në prezantimin e projektit të fizibilitetit të hekurudhës Durrës- Prishtinë/
