Ndryshimi i rregullores se FIFA-s i hap probleme Italise

Pas humbjes shkatërrimtare me Spanjën, Italia do ta kërkojë pjesëmarrjen në Botërorin 2018, nga porta e shërbimit, e thënë ndryshe nga faza e “play off”- eve, gjithmonë nëse nuk ndodh çmenduria dhe Spanja ngec në të dyja sfidat që i kanë mbetur (dhe Italia t’i fitojë të dyja).

Gjithsesi, ky duket një skenar më shumë se i pamundur, por sikur të mos mjaftonte makthi që do të kenë derisa të vijë siguria pas “play off”-eve, Kombëtarja “axurre” merr një tjetër lajm të keq. FIFA ka vendosur të ndryshojë sistemin e shortit për shpërndarjen e grupeve për Kupën e Botës “Rusi 2018”. Nëse emrat e mëdhenj të botës ishin gjithmonë kokë grupi, përfshirë këtu edhe vendin organizator, sivjet gjërat do të ndryshojnë totalisht.

Kjo do të thotë se në vazon e parë do të shkojnë 7 kombëtaret më të mira të botës, ndërsa e teta do të jetë Rusia, vendi organizator. Tashmë dihet që 32 pjesëmarrëset ndahen në 8 grupe me nga 4 skuadra, por nëse situata nuk ndryshon në dy muajt e ardhshëm, atëherë Italia rrezikon vërtet një grup ferri, gjithmonë nëse kualifikohet.

Renditja e fundit e FIFA-s i ka parë ata në vendin e 17-të, e thënë ndryshe, për momentin ato gjenden në vazon e tretë, gjë që do të thotë se përveç kryesueseve të rrezikshme si Gjermania, Brazili, Portugalia e Argjentina, rrezikojnë edhe kombëtare të tjera si Spanja e Anglia, që për momentin janë në vazon e dytë.

igurisht që kjo risi e qeverisë ndërkombëtare të futbollit, është një tjetër barrë në shpatullat dhe në këmbët e përfaqësueses së stërvitur nga Xhampiero Ventura, të cilët duhet t’i fitojnë me çdo kusht dy ndeshjet e ardhshme eliminatore, për të ngjitur shkallë në renditjen e përgjithshme dhe për të mbetur të paktën në vazon e dytë./panorama/