FALEMINDERIT! Kjo është e vetmja fjalë që del menjëherë nga zemra e çdo shqiptari, teksa mësohet se janë grumbulluar fondet e nevojshme për kurimin e Erkandës, nënës shkodrane të tre fëmijëvë.
Falë bujarisë së jashtëzakonshme, të zemrës së madhe të shqiptarëve kudo nëpër botë, pas thirrjes së Elvis Naçit dhe publikimit të mënyrave ku mund të kontribuohej, deri në këtë moment, vetëm në GoFundMe, janë mbledhur mbi 92 mijë dollarë përmes mëse 1800 donacioneve, në më pak se 20 orë, ndërsa shifra nevojshme ishte 85 mijë.
Me mundësitë e tjera për të kontribuar, shuma jo vetëm është arritur por edhe është tejkaluar. Kjo mund të quhet mrekullia shqiptare e radhës, e solidaritetit të jashtëzakonshëm për njerëzit në nevojë, në moment të vështirë shendetësor.
LEXONI EDHE: “Mos mi lini fëmijët jetim!”, thirrja e Erkandës nga Shkodra, nënë e tre fëmijëve që po lufton me sëmundjen e rëndë
Në raste të tilla, asnjë familje nuk mund t’ia dalë e vetme. Por mijëra shqiptarë, mijëra zemra kuqezi, kur nisin të rrahin me një ritëm, realizojnë edhe mrekullitë, siç është rasti i nënë Erkandës, tre fëmijët e të cilës nga sot, mund të buzëqeshin, të shpresojnë se nëna e tyre nuk do të mungojë… /ShkodraWeb/
