Ndodh edhe kështu. Një telefonatë e përgjuar e detyron të heqë dorë nga mandati i deputetit. Natyrisht, ngjarja nuk është verifikuar në Shqipëri, por në një vend shumë afër, ku jetojnë mijëra shqiptarë.
Deputeti maqedonas i LSDM-së Pavle Bogoevski ka dhënë dorëheqje nga funksioni i tij në Kuvend, pas publikimit të disa përgjimeve. Deputeti i majtë dëgjohet kur porosit lëndë të dyshimta, për të cilën ai tha se ka blerë vaj kanabisi për një të afërt.
Bogoevski vendimin e bëri të ditur në seancën e Komisionit për çështje të mandateve dhe imuniteteve në Kuvend, në të cilën po merret vendim për mandatin e Nikolla Gruevskit. Bogoevski ishte edhe kryetar i Komisionit.
“Kolegë deputetë qëndroni besnik ndaj principeve. E di se politika është një lojë e zjarrtë. Falënderoj të gjithë ata që më kanë bërë më të fortë këto dy vite”, deklaroi Bogoevski. Ai tha se vendimin e ka marrë që kur është paraqitur vetë në polici.