Këshilli Bashkiak i Shkodrës ka debatuar sot lidhur me skemën e re të ndihmës ekonomike dhe përjashtimin e mëse 2100 familjeve nga përfitimi i saj. Me përgjegjësi të lartë, të majtë e te djathtë kanë rënë dakort se skema e re nuk është transparente dhe penalizon qytetarët. Madje, ata kanë hartuar edhe një rezolutë duke kërkuar pezullimin e skemës dhe ndërmarrjen e ndryshimeve të nevojshme ligjore e nënligjore.
Në mbledhje ka marrë fjalën edhe kryetarja e Bashkisë Voltana Ademi, e cila qartazi është shprehur në favor të qytetarëve të perjashtuar nga përfitimi i “bukës së gojës” siç u shpreh ajo. Ademi ka risjellë në vemendje qëndrimin e konsoliduar tanimë jo vetëm të asaj personalisht, por edhe Shoqatës së Bashkive të Shqipërisë. Ademi ka ngritur tonet, duke folur mjaft e revoltuar.
“Po flasim për familje ekstremisht të varfëra. Në dy letra të derguara Gramoz Ruçit dhe Kryeministrit e kryetarëve të Grupeve Parlamentare me të njëjtën kërkesë e rëndësi për vemendje. Skema ose duhet të ndryshojë ose do të bëjmë luftë pasi nuk shoh situatë më të rendë se kjo”, u shpreh Ademi në mbledhje. Kështu, kryebashkiakja ja ka dalë që të marrë konsensus të gjërë edhe në Keshillin Bashkiak të Shkodrës, në përballjen e saj me qeverinë dhe kryeministri Rama, të paktën për çëeshtjen e ndihmës ekonomike.
