Ditën e sotme, në konferencën për shtyp, në krah të trajnerit Thomas Brdariç, në prag të ndeshjes ndaj Egnatias, ishte edhe portieri Bojan Zogoviç. Ky i fundit u shpreh se kuqeblutë kanë një grup shumë të mirë dhe mund të ia dalin që në fund të arrijnë synimet e tyre.
“Sinqerisht që, është për të ardhur keq që nuk morëm pikë në përballjen javën e shkuar ndaj Tiranës, sepse ishte një nga paraqitjet më të mira që ne kemi bërë. Të gjithë punuam mirë në ndeshjen e fundit dhe e vetmja gjë që mungoi ishte goli, por duhet të vazhdojmë me këtë ritëm dhe do të na shpërblehet mundi që ne bëjmë”,-thotë ai.
I pyetur për konkurrencën në portë, ku veç tij, është edhe portieri tjetër, Kristi Qarri, gardiani malazez, shprehet se Qarri është një portier që do të ketë një të ardhme të ndritur përpara.
“E falenderoj Kristin për paraqitjen që bëri kundër Kukësit, kur unë nuk isha. Ai është një djalë që ka talent e të ardhme, dhe do të bëjë shumë mirë në të ardhmen”-thekson 32-vjeçari.
Zogoviç flet edhe për ndeshjen e nesërme ndaj Egnatias, teksa thotë se kjo ndeshje duhet të fitohet me patjetër.
“Ne jemi në ndjekje të vendeve të para dhe në qoftë se synimi jonë është që për t’u ngritur sa më lart që të jetë e mundur, ne duhet ta fitojmë këtë ndeshje. Duhet të jemi shumë të disiplinuar dhe sigurisht është kohë e gjatë deri në fund të kampionatit, por nesër është një mundësi e mirë për të marrë fitoren dhe për të marrë 3-pikëshin gjithashtu.
Në përgjithësi, kemi merituar më shumë nga takimet tona për të marrë më shumë pikë, por realiteti është kështu që jemi në vendin ku jemi aktualisht. Eshtë ajo që thamë më parë, duhet të përqëndrohemi në të tashmen, në paraqitjet që ne do të bëjmë dhe pastaj kemi kohë për të menduar edhe për të ardhmen, ku do të jemi në renditje dhe të gjitha gjërat me rradhë”,-shprehet malazezi.
Në fund, Zogoviç pyetet edhe nëse e shikon ekipin më pretendent për titullin, në ndryshim nga sezoni i kaluar.
“Sigurisht që ka lojtarë që kanë ikur nga sezoni i shkuar dhe kemi marrë lojtarë të tjerë cilësorë që kanë bërë përformanca të mira. Kur bëmë analizën e ndeshjes me Tiranën, vumë re që gjithashtu edhe ne, ishim në gjendje të përballemi me ta.
Ndoshta të luajmë edhe më mirë se sa ata dhe do na duhet që ta gjuajmë topin në portë dhe ta çojmë në rrjetë. Më pas, në qoftë se do të vazhdojmë kështu, do të marrim edhe fitoret dhe do të arrijmë synimet tona”,-mbylli prononcimin e tij, portieri i Vllaznisë, Bojan Zogoviç. /Nga Maringlen ZHIVANI/
