“Misteret” e anulimit të prezantimit të drejtuesit të ri politik të PS- së për Qarkun e Shkodrës…

PS nuk ka prezantuar sot drejtuesin e ri politik për Qarkun e Shkodrës. Në fakt, pavarësisht asaj çfarë u raportua sot në disa portale lokale, takimi është anuluar mbrëmjen e të dielës, pak orës pasi ShkodraWeb mësoi dhe informoi për takimin prezantues të drejtuesit të ri politik, Enea Karakaçi, i cili zëvendësoi kryebashkiakun Benet Beci në këtë pozicion.

Po sërish, mediat lokale online, dhanë si arsye të anulimit të kësaj mbledhje prezantuese, impenjimet e Enea Karakaçit, si ministër i Infrastrukturës dhe Energjisë. Nuk është e vështirë të konstatohet se Karakaçi nuk ka patur asnjë impenjim zyrtar, të paktën që të meritonte anulimin e prezantimit të tij si drejtues politik në Shkodër. Mjafton një vëzhgim i thjeshtë në rrjetet e tij sociale apo të ministrisë që ai drejton, për ta konstatuar këtë fakt.

Praktikisht do të ishte e pamundur që të mos informohej audienca në rrjetet sociale, sidomos në dritën e orientimeve edhe të Asamblesë Kombëtare të fundit, sidomos të kryeministrit Rama. Edhe një detaj tjetër shumë i vogël dhe i thjeshtë. Sot është ditë zyrtare pushimi. Vërtetë që ministrat punojnë orar pa orar, por prezantimi para strukturave politike, është shumë më i rëndësishëm se një aktivitet jo i shpërfaqur publikisht, të paktën në rrjete sociale.

Ndërkohë, para rreth një ore, janë publikuar foto të prezantimit të Blendi Klosit si drejtues politik i Qarkut Durrës. Në fakt, në Shkodër Karakaçi do të prezantohej nga vetë sekretari i përgjithshëm i PS- së, Klosi. Nuk është e vështirë të hamendësohet se prezantimi i drejtuesve politikë, është miratuar më herët dhe datat kanë qenë të caktuara. Pra, prezantimi i Klosit në Durrës, nuk ka ndodhur papritur pa pandehur. E thënë më qartë, anulimi i prezantimit të sotëm të drejtuesit politik të qarkut Shkodër, Enea Karakaçi, nuk është për shkak të impenjimeve as të vetë ministrit dhe as të sekretarit të përgjithshëm të PS- së. A do të zbulohet ndonjëherë “misteri” që vonoi prezantimin e drejtuesit të ri politik të PS- së për qarkun Shkodër?! Me siguri, ka një skemë konspiracioni…