Policia e Shkodrës ia del të ndalojë një shtetas, i cili dyshohet si autor i një ngjarje të ndodhur para rreth 2 viteve. Sipas njoftimit zyrtar të uniformave blu, bëhet fjalë për një 23 vjeçar, banues në lagjen “Mark Lula” të qytetit të Shkodrës, i cili identifikohet Valter Ksolla. Ngjarja në fjalë ka ndodhur me 6 maj 2017 dhe i përfshirë ka qenë edhe boksieri i Vllaznisë Nelson Hysa, ndërsa ditën e sotme është kapur autori i dyshuar por bashkë me të janë vënë në pranga edhe dy vëllezër nga Gruda e Re, të cilët dyshohen se kanë përkrahur autorin e veprës penale. Më poshtë, mund të lexoni të plotë komunikatën e policisë së Shkodrës lidhur me aksionin policor “Gruda”.
Finalizohet me sukses Operacioni policor i koduar “Gruda”
Kapet dhe ndalohet autori i dyshuar i ngjarjes së ndodhur me datë 06.05.2017, ku ka mbetur i plagosur shtetasi N. H.
Nga strukturat e Drejtorisë Vendore të Policisë Shkodër pas një pune të mirëorganizuar, u finalizua operacioni policor “Gruda” ku u bë kapja dhe ndalimi i shtetasit në kërkim:
V.K, 23 vjeç, banues në Lagjen “Mark Lula”, Shkodër,
Ndalimi i tij u bë pasi Gjykata e Shkallës së Parë Shkodër, ka caktuar masën e sigurisë “Arrest në burg”, për veprat penale të “Vrasjes me paramendim, e kryer në bashkëpunim” mbetur në tentative, dhe “Prodhimi e mbajtje pa leje e armëve dhe municioneve luftarake”, parashikuar nga nenet 78, 22, 25 e 278 të Kodit Penal, pasi është autor i dyshuar për ngjarjen e ndodhur me datë 06.05.2017.
Gjithashtu si rezultat i këtij operacioni u arrestuan në flagrancë shtetasit N. K., 32 vjeç dhe K. K., 25 vjeç, banues në fshatin Grudë e Re, (vëllezër) për veprat penale të “Përkrahja e autorit të krimit”, “Prodhimi e mbajtja pa leje e armeve dhe municioneve luftarake” dhe “Kanosja”, parashikuar nga nenet 302, 84 e 278 të Kodit Penal, pasi këta dy shtetas kishin strehuar në banesën e tyre shtetasin në kërkim V. K, dhe dyshohet se me datë 14.04.2019 kanë qëlluar me armë zjarri në drejtim të banesës së shtetasit L. A., 50 vjeç, banues në fshatin Grudë e Re, Shkodër.
Materialet iu referuan Prokurorisë së Rrethit Gjyqësor Shkodër për veprime të metejshme.
