(Foto ilustrim) Ekipi i Parë i Vllaznisë i është rikthyer stërvitjes pasditen e sotme. Pas dy ditëve pa stërvitje, futbollistët kanë nisur përgatitjet për ndeshjen e rradhës, ndërsa këtë javë kuqeblutë nuk kanë ndeshje në fundjavë në Kategorinë e Parë. Mësohet se ekipi është stërvitur sot nën drejtimin e dy zëvendëstrajnerëve Safet Osja dhe Ideal Lekiqi. Kuqeblutë pezulluan stërvitjen pasi u mësua përmes mediave lidhur me një incident ku u përfshi trajneri Agim Canaj.
Ditën e djeshme Klubi doli me një deklaratë për mediat duke rikonfirmuar stafin drejtues, pas aludimeve për një dorëheqje të mundshme të tyre pas incidentit. Burime jo zyrtare pranë Klubit kuqeblu bëjnë me dije se Canaj mungon në stërvitje për arsye personale dhe jo për shkak të influencimit nga kërcënimet, të cilat u bënë publike nga mediat. Edhe drejtori sportiv Engin Firat ka thënë se me kthimin e tij në Shkodër, do të ketë një takim me drejtuesit për të vendosur mbi incidentin e ndodhur në stërvitje. Megjithatë, e rëndësishme është rifillimi i stërvitjes dhe vazhdimi i rrugëtimit drejt Supërliges i Vllaznisë, i cili është drejt finishit të suksesshëm.
