Prokuroria e Posaçme Kundër Korrupsionit ka kërkuar dënimin me 12 vite burg për ish-ministrin Saimir Tahiri. Ky i fundit, ish- ministri Tahiri, kerkoi pafajësi.
E njëjta masë është kërkuar edhe për ish-drejtorin e Policisë së Vlorës, Jaeld Çelën. Por për shkak të gjykimit të shkurtuar, SPAK ka kërkuar 8 vite burg për ish-zyrtarët.
Por pavarësisht se në sallë mbahej seanca, gjyqi u ndërpre pasi u fiken dritat. Ndërkohë, seanca pritet që të rifillojë kur të vijnë dritat.
Tahiri kishte shkuar i përgatitur në sallën e gjyqit, pasi kishte marrë me vete dhe një tabelë ku kishte caktuar detaje nga dosja e tij. Ai i ka kërkuar trupës gjykuese që të veprojë me profesionalizëm dhe të veprojë mbi bazë të provave.
“Ju kërkoj me përulësi, veproni me profesionalizëm të gjitha provat. Nëse do të bëni këtë gjë, unë do të jem i pafajshëm”, tha ai. Tahiri analizoi 4 episodet e tregtimit të narkotikëve në Itali, ndërsa shtoi se kishte kryer detyrën e tij. Avokati i tij Maksim Haxhiaj bëri një mbrojtje të detajuar për rastet e hetimit ndaj klientit të tij.
SPAK ka vendosur një praktikë, pasi çështja është voluminoze, sepse ka rreth 30 mijë faqe të dosjes dhe mund të ndodhë që trupa gjykuese të marrë kohën e nevojshme për të dhënë vendimin për çështjen në fjalë.
