Qeveria ka vendosur sot me Akt Normativ për të mbyllur klubet e natës, diskot, dhe lounge baret. Ministrja e Shëndetësisë, Ogerta Manastirliu njoftoi sot se këto ambiente janë shndërruar në vende grumbullimi për të rinjtë, të cilët sfidojnë hapur rregullat Anti-Covid.
Ajo tha se vendimi vjen për të mbrojtur qytetarët, të cilat mund të infektohen dhe në të njëjtën kohë t’ia kalojnë virusin familjarëve të tyre. Manastirliu njoftoi dhe sanksionet e forta për klubet e natës, diskot, lounge baret në rast se do të hapin aktivitetin e tyre.
POSTIMI I MANASTIRLIUT
? #COVID19
? Me vendimin e Qeverisë, nga sot hyn në fuqi Akti Normativ i cili:
– Ndalon hapjen e klubeve të natës, diskove, lounge bareve dhe çdo lloj shërbimi të kësaj natyre në mjedis të mbyllur apo të hapur, përveç restoranteve. Mosrespektimi i këtij detyrimi nga subjektet, dënohet me gjobë 3 000 000 lekë dhe me pezullim të aktivitetit për një periudhë një vjeçare.
– Ndalon muzikën pas orës 20:00 në të gjithë mjediset e shërbimeve të çfarëdolloji. Mosrespektimi i këtij detyrimi nga subjektet, dënohet me gjobë 1 000 000 lekë dhe në rast përsëritje, me pezullim te aktivitetit për një periudhë gjashtë mujore.
?Ministrja Manastirliu: Prioriteti ynë Nr.1 është mbrojtja e jetës së qytetarëve. Me vetëm këtë prioritet në mendje, do të marrim të gjitha masat e nevojshme.
