Është gjetur në ujërat e liqenit të Shkodrës trupi i pa jetë i Kapitenit Arben Anamali, i cili u mbyt dy ditë më parë. Trupi u gjet gjatë ditës së tretë të operacionit të kërkimit, që nisi rreth orës 05:00 të mëngjesit të sotëm.
Kapiteni i anijes për qëllime turistike e Bashkisë Shkodër, Arben Alamani 51 vjeç, dyshohet se gjatë përpjekjes për të shpëtuar dy turistë që kishin rënë në ujë, është mbytur.
Të martën pasdite, 15 turistë të huaj të nisur nga Shiroka, kërkuan që të shijonin me not liqenin dhe refuzuan të dëgjojnë kërkesën e kapitenit për të mos u futur në ujë, sepse era që vinte nga veriu ishte e rrezikshme. Pak minuta pasi ata u hodhën në ujë, kërkuan ndihmë, pasi era i kishte larguar rreth 50 metra larg nga anija.
Kapiteni është hedhur në liqen me dy kamerdare shpëtimi, por pasi ka arritur të shpëtojë dy turistët, ka mbetur vetë, pa mundur të kthehej për shkak të erës së fortë, e cila e shtynte në thellësi të liqenit.
