Ndërsa netët verore e gjallnojnë Shkodrën, mendoj se kishte me kenë me vend që Bashkia të fokusohej ma shumë te grupet e mirëfillta muzikore, ato që i napin shpirt e dinjitet artistik qytetit. Këta artistë, që përçojnë trashëgiminë muzikore shkodrane, meritojnë të evidentohen e të mbështeten. Në një kohë kur antivlerat shpesh marrin vëmendje të panevojshme, asht thelbësore që muzika qytetare, ajo që kultivon ndjeshmëri dhe identitet, të vehet në qendër të skenës publike.
Shkodra asht qyteti i biçikletave, i humorit të hollë, i rrugicave që frymojnë histori, kulturë dhe kujtesë kolektive.
Në stinën e verës, qyteti gjallnohet edhe ma shumë. Turistë të shumtë vijnë e kënaqen me këto tradita unike, që veç Shkodra din me i mbajtë gjallë.
Në çdo rrugë e në çdo cep ndjehet jehona e muzikës dhe e artit. Artistët tanë, të rinj e të vjetër, napin shpirtin mbi skenë tue krijue atmosferë të gjallë e plot vlera.
Mbështetja e këtyne grupeve që e ruajnë dhe e përcjellin zanin e vërtetë të Shkodrës nuk duhet të mbetet rastësore. Sepse Shkodra s’ka nevojë për muzikë që ulëret, por për jare që ta ambëlsojnë shpirtin, për tinguj që kanë kujtesë, klas e dashni.
“Muzika e mirë asht gjuha që i flet shpirtit – ajo s’ka nevojë me u ba e zhurmshme për me u ndje.”
Le të vazhdojmë me e mbajt gjallë shpirtin e Shkodrës, përmes artit të saj të mirëfilltë! /Nga Rozafa SHPUZA, publikuar në Facebook/
