Disa javë më parë, nisi në Report TV një emision nga profesori i njohur Ardian Ndreca. Duke nisur nga titulli “Elektroshok” por edhe ato emisione që u transmetuan deri një javë më parë, dukej qartë se nuk do ishte një program i zakonshëm televiziv.
Këtë të premte, emisioni nuk u transmetua siç pritej dhe interesimi duket ka qenë i lartë. Vetë profesor Ndreca ka shpjeguar arsyet, duke lënë të kuptohet mes rreshtave se emisioni është mbyllur jo nga ai por “dikush” tjetër. Pyetja më e thjeshtë është: Kë ka prekur në tela apo kë ka shqetësuar emisioni kritik “Elektroshok” i profesor Ardian Ndreca?!
PUBLIKIMI I ARDIAN NDRECA NË FACEBOOK
Tue qenë se shumë miq e të njohun më kanë shkrue tue më pyet pse nuk doli emisioni i rradhës “Elektroshok”, po i pergjigjem këtu me pak fjalë.
Pierre Bourdieu thotë se televizioni na dënon me pasë “fast thinkers” ashtu siç kemi “fast food”, “fast track” etj. Vetë imazhi televiziv i stërzgjatun stimulon pasivitet tek telespektatori, admirimi ashtu si edhe urrejtja kthehen në diçka pasive, pa sens!
Duhet nji kohë reagimi, pra s’duhet me e kthye në nji supermerkatë, por në nji laborator të lëvizshëm ku përdoret peshorja e farmacistit, tue ruejt nji mendësi galenike. Kjo gja kërkon impenjim moral ndaj atyne që të ndjekin, pse po ai ilaç që të shëron mundet edhe me të për-mbytë.
Me nji fjalë, asht ma mirë kur thohet “pse s’ka dalë?”, sesa “çka ia dashtë që ka dalë?”
Falenderoj të gjithë ata që më kanë ndjekë e inkurajue, ndoshta mund të rikthehem dikund me diçka të ngjashme…
