Mesnatën e 4 marsit, ka përfunduar afati për regjistrimin e shqiptarëve që jetojnë jashtë vendit dhe duan të votojnë në zgjedhjet e 11 maj 2025 për Kuvendin e Shqipërisë. Siç dihet, Kuvendi nuk shtyu afatin, duke mos pranuar kërkesën e Partisë Demokratike.
Ndërkohë, sipas të dhënave online të Komisionit Qendror të Zgjedhjeve, deri në mbylljen e afatit të regjistrimit, kanë aplikuar në sistemin PER 294.155 persona. Prej tyre, u është miratuar kërkesa 233.753 aplikuesve.
Nga të dhënat, konstatohet se interes më të lartë për tu regjistruar në zgjedhje, ka patur nga meshkujt që jetojnë jashtë vendit, në totalin e aplikuesve, ata përbëjnë 58,3%.
Shteti me numrin më të lartë të personave të regjistruar për të votuar, është Italia me më shumë se 148 mijë persona ose 40% të totalit. Pas saj, është Greqia me mbi 103 mijë dhe Gjermania me më shumë se 36 mijë persona.
Italia kryeson edhe për aplikuesit që u është miratuar kërkesa me rreth 87 mijë zgjedhës, për të vijuar me Greqinë rreth 62.500 dhe Gjermaninë me 24.500 persona.
Duke iu kthyer statistikave sipas qarqeve, Tirana ka numrin më të madh të të regjistruarve për votim me rreth 74 mijë, pasuar nga Fieri 49 mijë, Elbasani me 39 mijë aplikues. Shkodra renditet në vendin e 7- të nga 12 qarqe, me 26 mijë kërkesa.
Tirana kryeson edhe për numrin e kërkesave të miratuara nga KQZ- ja, me 49 mijë, ndjekur nga Fieri me rreth 30 mijë dhe Durrësi me rreth 24 mijë. Shkodra edhe këtu renditet e shtata me rreth 16400 zgjedhës të miratuar.
KQZ ka në shyrtim edhe 19134 kërkesa teksa ka refuzuar zyrtarisht më shumë se 113.227kërkesa të ardhura në sistemin PER.
