Zgjedhja e tij si gjyqtar i Kushtetueses u bë këtë të martë në mbledhjen e gjyqtarëve të Gjykatës së Lartë. Sandër Beci zëvendëson në këtë post Fatmir Hoxhën, i shkarkuar nga vetingu.
“Bazuar në nenin 7/ç të ligjit nr. 8577, datë 10.2.2000 ‘Për organizimin dhe funksionimin e Gjykatës Kushtetuese të Republikës së Shqipërisë’ (i ndryshuar) dhe Rregullores ‘Për zgjedhjen e anëtarit të Gjykatës Kushtetuese’, Mbledhja e Posaçme e gjyqtarëve të Gjykatës së Lartë zhvilloi, sot, më datë 15 mars 2022, procesin e votimit për zgjedhjen e anëtarit të Gjykatës Kushtetuese.
Mbledhja e Posaçme e gjyqtarëve të Gjykatës së Lartë, pasi u njoh me listën e kandidatëve të renditur nga Këshilli i Emërimeve në Drejtësi, në përfundim të procesit të votimit, vendosi të shpall fitues me 7 (shtatë) vota pro, kandidatin Sandër Beci.
Rezultati i votimit do t’i njoftohet menjëherë, Kryetarit të Kuvendit, Presidentit të Republikës dhe Kryetarit të Gjykatës Kushtetuese”, njofton Gjykata e Lartë.
