Mbetet në burg 28 vjeçari i dyshuar për përfshirje në ekzekutimin e ish- efektivit të FNSH Shkodër, u arrestua bashkë…

Gjykata e Lezhës ka dhënë ditën e sotme masën e sigurisë “arrest në burg” për Flutura Berisha dhe Nikoll Sherniku.  Kujtojmë Nikoll Sherniku 28 vjeç dhe Flutura Berisha 34 vjeçe, u vunë në pranga gjatë një aksioni të përbashkët të policisë së Lezhës dhe FNSH-së së Shkodrës pak ditë më parë.

Policia sqaroi se 28-vjeçari dhe gruaja me të cilën shoqërohej po lëviznin me një automjet tip “Toyota” të blinduar në zonën e Kunes, pranë Shëngjinit, kur janë neutralizuar nën dyshimin se ishin nisur për të kryer një vepër kriminale.


Dy të arrestuarit kishin në automjet edhe një të mitur 15 vjeç, por kjo nuk i ka ndaluar që të mbanin me vete një armë kallashnikov plot me fishekë dhe radiomarrëse si ato të policisë.

Sherniku dhe Berisha sapo kanë parë uniformat blu kanë dalë nga makina dhe kanë tentuar të largohen me vrap, me 34-vjeçaren që ka provuar edhe të fshehë kallashnikovin.

Por ajo çka merr vëmendje është fakti se Nikoll Sherniku duhet të ishte në banesën e tij dhe jo të lëvizte i lirë në Shëngjin. Kjo pasi, ndaj tij gjykata ka vendosur masën e sigurisë “Arrest në shtëpi”, në përfundim të çështjes gjyqësore që lidhet me vrasjen e ish-punonjësit të policisë Xhulio Prela.

Fillimisht Sherniku u arrestua si person që kishte dijeni dhe ishte implikuar në ngjarjen e ndodhur në dhjetor 2020 në Gajush të Lezhës, duke u akuzuar për “Moskallëzim të krimi, por u la në “arrest në shtëpi”.

Gjykata asokohe arriti në konkluzionin se ishte Redion Hysa autori i vrasjes së ish-efektivit të Forcave të Ndërhyrjes së Shpejtë të Shkodrës, duke kryer 3 qitje me pistoletë në drejtim të tij.

Vrasja e Xhulio Prelës dy vite më parë dyshohet se nisi pas një sherri për dritat e gjata të makinës, pasiish-efektivi i FNSH, teksa kthehej nga fshati Kosmaç i Shkodrës ndaloi kur autorët i sinjalizuan me drita dhe elektrik dore.

Sipas dosjes hetimore, Prela ka ndaluar duke menduar se personat që e sinjalizuan mund të kishin nevojë për ndihmë, por në atë moment mbi të u shkrep një pistoletë TT.