Ashtu siç kishte pohuar në bisedë telefonike me ShkodraWeb, Alban Xhaferi është i kualifikuar për fazën finale të ankandit ë KF Vllaznia sh.a. Ndërkohë, ShkodraWeb ka mësuar nga burime pranë tyre, se dy subjektet e tjera në garën e ankandit, Almiro Gurakuqi dhe Emiljano Zhupa kanë marrë përgjigjen zyrtare se janë skualifikuar nga faza finale.
Mësohet se Gurakuqi dhe Zhupa kanë patur mangësi në dokumentacionin e depozituar për pjesëmarrjen në ankand. Mangësitë e konstatuara, u janë bërë të dyve zyrtarisht me shkresat që kanë marrë sot të mbyllura në zarfe respektive.
Po ashtu, burime pranë Gurakuqit i pohojnë ShkodraWeb se ai do të ushtrojë të drejtën e ankimimit pranë Autoritetit Shitës, në këtë rast Bashkia e Shkodrës. Ndërkohë, është i paqartë pozicioni i Zhupës, për të cilin gjatë ditës së sotme u tha se edhe është tërhequr nga gara e ankandit për Vllazninë.
Duke nisur nga sot që kanë marrë në dorë përgjigjen zyrtare nga Njësia e Ankandit, të skualifikuarit Gurakuqi e Zhupa kanë 7 ditë kalendarike në dispozicion për të bërë ankimimin e tyre. Autoriteti Shitës, pasi të shqyrtojë ankimimet përkatëse, do të dalë me një vendim që do tu jepet të interesuarve. Nëse ata kanë sërish pretendime, kanë mundësinë e ankimimit në Komisionin e Prokurrimeve Publike.
Mangësitë në dokumentacionin e kërkuar, si për çdo ankand apo tender tjetër publik, skualifikojnë pjesëmarrësit në gara të tilla. Precedentët e mëparshëm, tregojnë se Autoriteti Shitës por edhe vetë KPP- ja, nuk mund të bëjnë asgjë më shumë veçse të konfirmojnë vendimin e Njësisë së Ankandit.
Me shumë gjasa, Alban Xhaferi, i mbetur i vetmi në garë, është shumë pranë marrjes së pronësisë së KF Vllaznia sh.a. Siç dihet, Xheferi, i cili është edhe sponsori aktual i kuqebluve, ka ofruar 625 milion lekë të vjetra nga 507 milion që ishte dyshemeja e përcaktuar. /ShkodraWeb/
