Komisioni për Edukimin dhe Mjetet e Informimit Publik zhvilloi seancën dëgjimore me anëtarët e Këshillit Drejtues të Radio Televizionit Shqiptar.
Para Komisionit dolën kryetari i Këshillit Drejtues, Leka Bungo, dhe 3 anëtarët: Ardita Reçi, Dionis Papadhimitri dhe Engjëll Ndocaj, ndërsa Milena Selimi, Edmond Tullumani, Ilir Keko dhe Albert Minga e argumentuan qëndrimin e tyre me anë të një letre.
“Në vlerësimin tonë, procedura e shkarkimit të anëtarëve të Këshillit Drejtues në mënyrë kolektive, me nxitim dhe në shkelje të procedurave ligjore, është ndikuar nga veprimet antiligjore të kryetarit të Këshillit Drejtues, përfshirë edhe procedurën e fundit të zgjedhjes së Drejtorit të Përgjithshëm të RTSH-së. Kjo procedurë është nisur nga kryetari i KD, është drejtuar nga ai në disa seanca mbledhjeje, vendimi është lexuar edhe publikisht nga z. Bungo, por vetëm pasi u konstatua mossuksesi i kandidatit të preferuar të kryetarit të Këshillit, gjithçka u anatemua dhe u quajt e paligjshme,” thuhet në letrën e katër anëtarëve të KD-së.
“Ju kërkoj juve veçimin e shqyrtimit të veprimtarisë sime si anëtare e Këshillit Drejtues me atë të kolegëve të tjerë,” deklaroi Ardita Reçi, anëtare e Këshillit Drejtues të RTSH-së.
“Nuk kam përfituar asnjë projekt gjatë gjithë periudhës katërvjeçare që kam qenë pjesë e RTSH-së,” tha Dionis Papadhimitri, anëtare i Këshillit Drejtues të RTSH-së.
“Dobësia më e madhe e Këshillit Drejtues ka qene dhe mbetet edhe ditën e sotme, moskoordinimi. Ky është shprehur gjithmonë në ato që quhen ‘sherre’ midis kryetarit të Këshillit Drejtues dhe Drejtorit të Përgjithshëm të Radio Televizionit Shqiptar,” tha Egjëll Ndocaj, anëtar i Këshillit Drejtues të RTSH-së.
“Nëse kam bërë shkelje gjatë gjithë kësaj periudhe si kryetar i Këshillit, që kam bërë pa dyshim, bëj një mea culpa, por asnjëherë nuk janë bërë të qëllimshme dhe për të dëmtuar punën. [RTSH] duhet mbyllur dhe të bëhet reforma e vërtetë. Mbas tre muajve të vijnë të paraqiten nëpër komisione, ku të jenë në juri vetëm të huaj, asnjë shqiptar,” u shpreh Leka Bungo, kryetar i Këshillit Drejtues të RTSH-së.
Edhe anëtari tjetër Mevlan Shanaj argumentoi qëndrimin e tij përmes një letre dërguar Komisionit.
Në fund të dëgjesave, kryetarja e Komisionit, Ina Zhupa, njoftoi nisjen e procedurave për kalimin e projektvendimit në Kuvend për lirimin e Gëzim Podgoricës dhe Genc Përmetit pas dhënies së dorëheqjes së tyre dhe shkarkimin e Këshillit Drejtues, ndërsa çdo mandat do të shqyrtohet më vete. /rtsh.al/
