Anton Kokaj është konfirmuar si kryetar i PD-së në Malësinë e Madhe.Është mandati i dytë për Kokajn, i cili ishte edhe kandidat për kryetar bashkie në vitin 2015. Edhe në bashkinë tjetër, atë të Vau- Dejësit, është rikonfirmuar kryetari lokal. Agim Bushati do të jetë edhe për një mandat në krye të degës vendore. Përfundojnë kështu zgjedhjet në dy bashki të rëndësishme të qarkut të Shkodrës, teksa vemendja tashmë është perqendruar në Bashkinë e Shkodrës.
Zgjedhjet për këtë degë, e cila konsiderohet edhe bastion i PD-së, do të mbahen me 1 dhjetor. Duhet thënë se procesi zgjedhor deri në nivelin e grupseksioneve, nuk ka kaluar pa polemika, debate dhe diçka më shumë se kaq. Madje, disa ngjarje kanë dalë edhe në media për konfrontim deri fizik. Mbi tryezën e Bashës në Tiranë është lista me 20 emra të propozuar nga mbledhjet e bazës demokrate në Shkodër. Ishte paralajmëruar përzgjedhja e emrave final për garën e Shkodrës para dy ditëve, por akoma nuk ka emra zyrtarë.
Të shtunën, kryetarët e grupseskioneve të zgjedhur janë mbledhur në një drekë pune nga kryetari aktual Ramiz Çobaj në mjediset e Shkodra Park. Mësohet se kanë qenë të pranishëm në total 43 persona. Nuk ka informacione lidhur me takimin, por mësohet se është diskutuar për fazën finale, atë të përzgjedhjes së kryetarit, pasi të vijnë propozimet zyrtare nga kryesia e PDSH-së në Tiranë. Më herët kishin qarkulluar informacione se në garë do të përballeshin dy drejtuesit aktual Çobaj dhe Aleksandër Marleci. Por edhe në këtë drekë pune, nuk kanë qarkulluar emra të mundshëm.
Zgjedhjet e kryetarëve të PD-së në bashki, i paraprijnë Kuvendit që do të mblidhet me 16 dhjetor si dhe sshënojnë fundin e organizimit të opozitës në prag të zgjedhjeve të vitit që vjen. Realisht, suksesi ose jo i këtyre zgjedhjeve do të testohet në zgjedhjet e 30 qershorit të cilat janë “gur prove” mjaft i rëndësishëm. /ShkodraWeb/
