“Luajtëm mirë dhe shënuam dy gola shumë të bukur”, trajneri i Vllaznisë Brdariç: Nuk i mbaj mend emrat e shënuesve

Vllaznia është e vetmja nga 10 skuadrat e Kategorisë Superiore, që ka marrë maksimumin e pikëve në dy javët e para, ndërsa trajneri gjerman Thomas Brdaric u shfaq mjaft i lumtur në intervistën e dhënë për emisionin “Gol pas Goli”, por refuzoi të shpalosë objektivat e sezonit.


Një start shumë i mirë, me tre fitore në po kaq ndeshje zyrtare, përfshi edhe ndeshjen e Kupës. Tifozët kanë filluar të ëndërrojnë, por deri ku mund të shkojë kjo skuadër?

E dimë për atmosferën që ekziston në qytet dhe dëshirën e madhe për të fituar, por ne kemi punën tonë dhe duam ta bëjmë më së miri në fushë e lojës, duke shpresuar të marrim sa më shumë suksese.

Ishte e lehtë, apo e bëtë ju të lehtë ndeshjen e sotme?

Duket gjithmonë e thjeshtë, por nuk është ashtu, pasi ne dhamë maksimumin dhe jam i kënaqur me paraqitjen e skuadrës sot. Ne nuk duhet t’i vëmë objektiva vetes, por të marrim ndeshjet me radhë dhe të shpresojmë të ecim kështu.

Mbështet ShkodraWeb Media

I trembeni ndonjë ndryshimi të situatës në javët e ardhshme?

Gjithçka mund të ndodhë, pasi jetojmë në një periudhë të veçantë, ku luajmë futboll pa tifozë. Megjithatë ne luajmë për veten, tonë, për një klub me emër shumë të madh si Vllaznia dhe duhet të punojmë për të vijuar me ecurinë e mirë. Ju më bëni pyetje dhe unë ju përgjigjem, por futbolli është i tillë, që gjithçka ndryshon shumë shpejt. Ne jemi në një moment të mirë dhe duhet të punojmë për të vijuar sa më gjatë kështu.

Mund të shkohet larg pa pasur objektiva?

Ne po punojmë për një projekt, që synon ndërtimin e një skuadre cilësore. Nuk na pëlqen të shpalosim objektivat përpara kamerave, por të punojmë me përulje dhe të marrim frytet e punës tonë në fushë.

Cili nga golat të pëlqeu më shumë?

Nuk i mbaj mend emrat e shënuesve sot, pasi di vetëm që luajtëm mirë dhe shënuam dy gola shumë të bukur.

ShkodraWeb Channel