E nderuara zonja Ministre,
Duke parë përshkallëzimin e veprimeve prej anës së forcave policore në njësinë administrative Boks-Rrjoll të Velipojes, ditën e sotme, e djelë, 22 shkurt 2026, si ish deputet i Parlamentit i zgjedhur në një kohë nga ata banorë, si qytetar dhe anetar i komunitetit, ju drejtohem me kërkesën për:
Largimin e menjëhershëm të forcave policore nga Rrjolli, në mënyrë që të shmanget përshkallëzimi i mëtejshëm i tensionit dhe cenimi i të drejtave themelore të qytetarëve.
Ndaljen e çdo forme represioni ndaj popullsisë civile, e cila jeton prej shekujsh në ato troje dhe gëzon të drejtën legjitime për mbrojtjen e pronës dhe dinjitetit të saj.
Ndërprerjen pa afat të punimeve të firmës, deri në sqarimin e plotë të së drejtës ne atë anë.
Fillimin e një hetimi të plotë, me themel, të paanshëm dhe transparent mbi aktet e pronësisë në Kadastrën e Shtetit, për të verifikuar ligjshmërinë e veprimeve të palës investitore extra-komunitare dhe për të garantuar zbatimin e Kushtetutës dhe të ligjeve në fuqi.
Çështja e Rrjollit nuk është thjesht një konflikt administrativ; ajo prek thelbin e shtetit të së drejtës, të drejtën e pronës, sigurinë juridike dhe besimin e qytetarëve te institucionet.
Është shumë e rëndësishme të lexohet dhe mësohet ligji, te drejtat dhe detyrimet e institucionit qe ju drejtoni: Garancia e rendit publik nuk mund dhe nuk duhet të kthehet në instrument presioni ndaj qytetarëve. Përkundrazi, Ministria e Punëve të Brendshme, Policia e Shtetit, ka detyrimin kushtetues të sigurojë balancën midis zbatimit të ligjit dhe mbrojtjes së lirive themelore, ashtu si ka detyrimin e hetimit paraprak kryesisht të ceshtjeve te denoncuara publikisht nga ata qytetarë.
Ndaj, në këto ditë prej jush, si titullare institucioni, ju kërkohet reflektim institucional, maturi dhe kthim i menjëhershëm në rrugën e dialogut dhe të ligjshmërisë. /Nga Romeo GURAKUQI, ish- deputet i PD Shkodër, publikuar në Facebook/
