5 vjet e 9 muaj ka zgjatur qendrimi në drejtim të OSHEE Shkodër i Armand Zhuka, i cili tashmë është larguar duke i lënë vendin Qazim Ramallarit në drejtimin e këtij filiali të kompanisë shtetërore.
Gjatë kësaj periudhe, në sistemin e furnizimit me energji elektrike, janë bërë mjaft investime, efikasiteti i të cilave pritet të testohet në muajt apo edhe vitet në vijim për efektivitetin e tyre.
Armand Zhuka nga Fieri, mund të mbahet mend si drejtuesit më jetëgjatë të këtij sektori nga viti 1990 e këtej. Interesant është fakti se përsëri, në krye të kësaj ndërmarrje, do të ulet një tjetër “jabanxhi”, kuksiani Qazim Ramallari.
Edhe më interesante bëhet situata, teksa edhe para Zhukës, në Shkodër si drejtor i OSHEE ka qenë një tjetër “jabanxhi”, Rezart Isufi. Dikur Shkodra krenohej me personalitetet e kësaj fushe, ndërsa sot nuk ka kapacitete për një drejtor OSHEE- je, të paktën duke gjykuar nga këto stafeta.
Ndryshimi në OSHEE Shkodër bëhet publik në ditën e prezantimit të drejtuesit të ri politik të PS- së për Qarkun Shkodër, Enea Karakaçi. Duke qenë njëkohësisht edhe ministër i Infrastrukturës dhe Energjitikës, duket se ndryshimet e pritshme në drejtoritë rajonale të Qarkut të Shkodrës, i ka nisur pikërisht nga dikasteri që vetë drejton.
