Ben Blushi nuk do të jetë më drejtori i Përgjithshëm i Top Channel. Mësohet se Blushi ka dhënë dorëheqje ditën e sotme nga media e njohur të cilën e drejtonte prej katër vitesh.
Lajmi i largimit të tij nga Top Channel është i vërtete, madje ai ka njoftuar dorëheqjen me anë të një e-maili.
Në këtë mesazh që i është dërguar drejtuesve të Top Medias, Ben Blushi saktëson se po largohet nga kjo detyrë dhe po le median e njohur shumë herë me të shëndetshme dhe më të besueshme seç e gjeti katër vite më parë.
“Duke nisur nga sot nuk do jem më në Top Channel. Me bindjen se sot po largohem nga një kompani më e shëndetshme, më e besueshme dhe më e madhe në krahasim me atë që gjeta para katër vitesh, ju uroj të gjithëve punë të mbarë. Ben Blushi,”- shkruhet në e-mail.
Pas largimit të tij, ka reaguar presidentja e televizionit Vjollca Hoxha. Në një e-mail drejtuar stafit, Hoxha, duke falënderuar për punën e tij Blushin, shkruan se drejtimin e Top Channel tashmë do ta marrin trashëgimtarët, referuar fëmijëve të saj, Sara, Lori, Redia dhe Etan Hoxha.
“Të dashur, Duke falenderuar z.Blushi për kontributin e tij në Top Channel, rruga jonë e përbashkët vazhdon, në vigjilje të 20 vjetorit të shtëpisë sonë të dytë, drejt 20 viteve të tjera e më shumë, që uroj të jenë po kaq të shkëlqyera në mos më tepër nga puna e secilit prej jush. Top Channel do të vazhdojë të administrohet nga trashëgimtarët e atij që 20 vite më parë nisi një ëndërr të bukur që ju e mbani gjallë çdo ditë,” shkruan Hoxha.
