Është përcjellë për në “banesën e fundit” këtë të mërkurë, Gen Balca, një artist në shpirt por edhe në jetë. Ai hynte tek ata artistë që pavarësisht se nuk morën famën apo edhe atë që merituan, u vlerësuan maksimalisht nga ata që i njohën apo shijuan artin e tyre.
Eugen Balca, ndër kitaristët më virtuozë të Shkodrës, djali i të mirënjohur Lec Balca, e kishte artin të trashëguar në gen. Për shumë vite pjesë e Radio Shkodrës, sot RTSH Shkodra, Geni ishte artist edhe në përditshmërinë e punës që realizonte me pasionin për muzikën që nuk iu nda deri ditën e fundit të jetës.
Muzika ishte balsami i jetës së tij, ku gjente prehje e qetësi edhe në momentet jo të lehta, të cilat ishin të shumta në 48 vitet e jetës tokësore. Edhe sot, kujtohen vitet 2000, kur “Country Club” në Shkodër, ishte zemreku i muzikës “live” dhe ku merrte shpirt nga zëri i Luiz Ejllit, duart e Gen Balcës, pasioni i Alfonc Babës, më vonë Ylber Tahirit.
Ata që e njohën nga afër, e dinë se Geni jetoi ashtu siç deshi, e shijoi jetën në mënyrën që ai zgjodhi, duke lënë pas imazhin dhe emrin e një artisti me zemër të mirë dhe me talent të fortë që nuk mori kurrë atë që meritonte. Pushofsh në paqe Gen!
