Është shuar në moshën 69-vjeçare Bardhyl Lohja, një prej figurave të njohura publike në Shkodër. I lindur në vitin 1955, ai ishte i përfshirë në lëvizjen demokratike në fillim të viteve ’90 dhe kontribuoi në shoqatën e ish- të përndjekurve politikë.
Pas viteve të vështira të internimit gjatë regjimit komunist, ndoqi studimet për drejtësi dhe ushtroi profesionin si gjyqtar dhe më pas si avokat. U zgjodh dy herë Kryetar i Këshillit të Bashkisë Shkodër pas vitit 2007, ku dha një kontribut të rëndësishëm në jetën institucionale të qytetit.
Ndërkohë, një nga miqtë e tij të afërt, ish- kryetar i Këshillit të Qaerkut dhe ish- prefekt i Shkodrës, Maxhid Cungu, shkruan në rrjetet e tij sociale për këtë humbje:
Lamtumirë Bardhyl Lohja! U nda nga kjo jetë Bardhyl Lohja, shoku im i ngushtë, bashkëpunëtori i palodhur dhe pjesë e familjes tonë. Është një dhimbje që vështirë përshkruhet me fjalë, nji humbje e madhe për të gjithë ne që patëm fatin ta kishim pranë.
Bardhyli lindi në vitin 1955 në Shkodër, qyteti që e deshi me shpirt dhe të cilit iu përkushtua me gjithë qenien e tij. Aty u rrit, u formua, vuajti dhe punoi me përkushtim të rrallë gjatë gjithë jetës. Edhe pse nxënës ekselent, iu mohua e drejta për të ndjekur studimet e larta për shkak të qëndrimit opozitar të familjes ndaj regjimit diktatorial. Për këtë arsye, Bardhyli bashkë me familjen përjetoi internimin për pesë vite, një sakrificë që e kaliti dhe e bani edhe ma të vendosun në rrugën e së drejtës.
Ishte ndër të parët që u përfshi në lëvizjen demokratike të fillim viteve ’90, aktiv në shoqatën e ish të përndjekurve, dhe në grevën e urisë të vitit 1991, një za i guximshëm për lirinë dhe drejtësinë. Më pas, eci përpara duke ndjekur studimet për drejtësi dhe ndërtoi nji karrierë të ndritun si gjyqtar dhe avokat, gjithmonë i përulur, korrekt dhe i drejtë.
Pas vitit 2007, Bardhyli u zgjodh dy herë Kryetar i Këshillit të Bashkisë Shkodër. E përjetoi këtë detyrë si një mision qytetar, ku dha maksimumin me përkushtim, ndershmëri dhe një dashuni të pakushtëzuar për Shkodrën.
Ai ishte gjithmonë pranë njerëzve, i ndjeshëm, i urtë, gjithmonë i gatshëm për të ndihmuar. Por mbi të gjitha ishte një njeri familjar, i përkushtuar me shpirt ndaj bashkëshortes Makbule, djemve Sead dhe Sidrit, dhe vajzës së tij Iris si dhe nipave e mbesave. Ata ishin krenaria dhe dashunia e jetës së tij. Me urtësinë dhe fisnikërinë e tij, ai krijoi një mjedis të ngrohtë ku u trashëguan vlera të qëndrueshme dhe respekt i ndërsjellë.
Lamtumirë, Bardh Lohja! Shkodra humbi nji nga bijtë e saj më të denjë. Ne humbëm nji mik të dashur, një njeri të rrallë. Do të na mungosh pafundësisht. Zoti i madhnueshëm dhuroftë për ty dritën e pasosun të Xhehnetit!
