Lajm i mirë për artin dhe humorin shqiptar. Mane Lumani, një nga parodistët legjendarë të Vlorës, ka kaluar problemet shendetësore të javëve të fundit. Lajmin e mirë e konfirmon në rrjetet sociale Genc Demiraj, gazetar. Në një publikm në Facebook ai shkruan:
“Kthehet Mane Lumani…! Na erdhi Maneja sot që në mëngjes, Mane Lumani i parodisë vlonjate! Kishte bërë ndërhyrjen shëndetsore para disa ditësh me shumë sukses dhe erdhi të na takonte i malluar e si ogur i mirë para shfaqjes së re…!
Ishte shend e verë Maneja dhe nuk rreshte pa falenderuar mjekët e spitalit Amerikan nr. 1 me në krye doktoreshë Dhuratën, për kujdesin, përkushtimin e profesionalizmin e treguar. Donte ti përmendte të gjithë një për një, emër për emër, me mjekë, infermierë e gjithë staf por nuk kish mundësi vokale ndaj me dorën në zemër u përulej të gjithëve…!
Doktor Bert Peshën në Fier nuk e harronte sepse ai ish jo vetëm iniciatori por edhe një mik i afërt i parodistëve…! I madhi artist Mane Lumani, erdhi sot jo vetëm të na takonte por edhe të çmallej me skenën e tij që e rriti dhe e lartësoi si një artist plot vlera.
I përlotur kërkoj ndjesë që nuk mundëte të merrte pjesë këtë herë në numrin e rradhës krahas vëllezërve të tij të parodisë Afrimit e Agronit, por me zemër është këtu në këtë skenë e në këtë tempull.
Mirë se u ktheve Mane Lumani, paç përherë vetëm shëndet e lumturi dhe me zërin tënd të “sfumuar” bashkohemi të gjithë në falenderimin për mjekët duarartë të Spitalit Amerikan nr. 1, faleminderit…!”, shkruan ai.
Me 17 nëntor 2021, në rrjete sociale, familja e tij deklaroi se Mane Lumani, një nga 4 Parodistët e Vlorës, është duke kaluar një gjendje të rënduar shëndetësore! Në heshtje dhe larg vëmendjes së opinionit, Mania i humorit shqiptar vuante pamundësinë financiare për një ndërhyrje kirurgjikale në zemër dhe prostatës. Mesa duket, çdo gjë ka vajtur siç duhet dhe kjo vlerë e artit e humorit shqiptar i është bashkuar kolegëve të tij. /ShkodraWeb/
