Kuvendi i Republikës së Shqipërisë ka miratuar me 88 vota ligjin për vetting-un në Polici dhe Gardë. Gjithashtu, Parlamenti miratoi me 121 vota pro dhe asnjë kundër ngritjen e komisionit hetimor për çështjen Tahiri.
Komisioni i kërkuar nga opozita do të hetojë veprimtarinë dhe ligjshmërinë e veprimeve administrative të organeve të pushtetit legjislativ dhe ekzekutiv në kultivimin dhe trafikun e lëndëve narkotike, përfshirë dhe çështjen për të cilën akuzohet ish ministri i brendshëm, Saimir Tahiri, ndërhyrjeve të këtyre pushteteve në ushtrimin me ndjekjes penale në mënyrë të pavarur nga organi i prokurorisë.
Megjithëse shumica dhe opozita kishin rënë më parë dakord për ngritjen e komisionit ata sërish nuk kanë kursyer përplasjet dhe akuzat ndërmjet tyre. Deputetët e te dyja palëve janë përplasur midis tyre në lidhje me çështjet e rendit dhe kultivimit të lëndëve narkotike. Kryetar i këtij komisioni do të jetë demokrati Paloka, ndërsa n/kryetare socialistja Ermonela Felaj.
Gjithashtu parlamenti miratoi me 88 vota pro, 1 kundër dhe 32 abstenim edhe ligjin për kontrollin kalimtar dhe periodik të punonjësve të policisë së shtetit ose siç njihet ndryshe edhe si vettingu. Në ligj janë marrë parasysh dhe amendimet e paraqitura nga lëvizja socialiste për integrim.
