Libri ‘Kurban’ i kryeministrit Edi Rama është përkthyer në gjuhën italiane me titullin “Il Sacrificio”. Lajmin e ka bërë të ditur vetë kryeministri përmes një një postimi në rrjetin social Facebook që në orët e para të ditës: “Mirëmëngjes dhe me librin e sapodalë në libraritë italiane ju uroj një ditë të mbarë.”.
Ndërsa parathënia e librit të Kryeministrit është shkruar nga Daria Bignard, në kopertinën e tij lexohet: “Ishte viti 2000, Tirana nuk ishte aspak ajo që është sot. Ky libër që duket sikur është shkruar për të kaluarën e Edi Ramës si kryetar i Bashkisë së Tiranës, në të vërtetë i drejtohet së ardhmes. Tek riprodhon një Shqipëri që degradon çdo ditë e më shumë, ai e godet mu në zemër vuajtjen tonë dhe duket sikur thotë: unë s’do ta bëja kështu.”.
Libri ‘Kurban’ u botua në vitin 2011, kur Rama humbi zgjedhjet për bashkinë e Tiranës. Rezultati ishte shumë i ngushtë. Në numërimin e parë, Rama ishte para kundërshtarit me vetëm 9 vota.Më pas Partia Demokratike bëri një ankesë për rinumërimin e votave të pavlefshme…
Rama vendosi të shkruajë dëshminë e situatës në Shqipëri duke përballur vizionin e tij në modernizimin e Tiranës dhe Shqipërinë me Berishën autoritar. Rama ka bërë disa promovime të këtij libri brenda dhe jashtë vendit. Në një promovim të 2013-ës në Tiranë Rama është shprehur edhe për motivet e botimit të këtij libri: “Kam ecur para duke kujtuar. Si për të shlyer një borxh. Në radhë të parë ndaj nënës, fëmijëve dhe gruas sime, që e marrin çdo ditë në lëkurën e tyre koston e të qëndruarit tim brenda vorbullës së fortë ku ndodhem që kur kam hyrë në politikë. Ndaj bashkëpunëtorëve, miqve, mbështetësve, të njohur a të panjohur. Ndaj kujtdo që bëri diçka për mua në rrugëtimin e njëmbëdhjetë vjetëve më të bukur të jetës sime – janë shumë që bënë vërtet shumë apo fare pak, sadopak, nga fare pranë ose nga shumë larg. Të gjithëve u ndiej një borxh. Më ngjan sikur kam dal publikisht lakuriq. E di, siç e dini edhe ju, që s’e kam për herë të parë, po çdo lakuriqësi ka një dobësi të vetën që të bën të ndjehesh i kërcënuar. E nëse ka një gjë që më tremb më shumë tani që çka kam shkruar e keni ju në dorë, nuk është që ky libër edhe mund të mos ju pëlqejë. Kjo do ishte gjysma e së keqes.”, shkruan Edi Rama.
