Partia Demokratike do t’i nënshtrohet një riorganizimi të brendshëm zgjedhor. Në mbledhjen e kryesisë së PD-së, të mbajtur sot, 16 mars, u vendos që zgjedhjet për kryetarin e ri të partisë të mbahen më 23 maj, ndërsa dy javë më vonë, më 6 qershor, do të mblidhet Kuvendi Kombëtar.
Kryesia përcaktoi gjatë mbledhjes së sotme edhe afatet, ku është parashikuar që deri më datë 30 prill të jetë përmbyllur i gjithë procesi i zgjedhjes së kryetarëve të degëve në të gjithë vendin. Aktualisht disa kryetarë degësh janë zgjedhur, ndërsa pritet zgjedhja e të tjerëve deri në këtë datë.
Më pas, procesi do të pasojë zgjedhjen e drejtuesit të ri të Partisë Demokratike, më 23 maj. Ky cikël riorganizimi do të përmbyllet më 6 qershor, data e mbledhjes së Kuvendit Kombëtar të partisë.
Gjatë mbledhjes së sotme, u caktua edhe grupi i punës që do të merret me ndryshimet statutore.
Grupi i përbërë nga 10 anëtarë, do të drejtohet nga kreu i Grupit Parlamentar Gazment Bardhi, ndërsa anëtarët e tjerë do të jenë: Oerd Bylykbashi, Ivi Kaso, Enno Bozdo, Gent Strazimiri, Elda Hoti, Keltis Kruja, Adriana Kalaja, Marash Logu dhe Franc Nuri.
Grupi për Rishikimin e Statutit:
Gazment Bardhi – Kryetar
Oerd Bylykbashi – Anëtar
Ivi Kaso – Anëtar
Gent Strazimiri – Anëtar
Enno Bozdo – Anëtar
Elda Hoti – Anëtar
Keltis Kruja – Anëtar
Adriana Kalaja – Anëtar
Marash Logu – Anëtar
Franc Nuri – Anëtar
Ky është procesi i parë zgjedhor që Berisha zhvillon nën logon e Partisë Demokratike pasi katër vite më parë, kur ky proces u zhvillua nën siglën e Komisionit të Rithemelimit dhe gjatë përplasjeve me Bashën.
