Kriza dhe mosdakordësia ndërmjet opozitës së Partisë Demokratike dhe Lëvizjes Socialiste për Integrim me maxhorancën e Partisë Socialiste duket se kanë vënë në lëvizje Uashingtonin. Ditën e sotme në Tiranë do të mbërrijë zëvendësndihmëssekretari i Shtetit për Europën, Matthew Palmer, ku do të zhvillojë disa takime të ndara me krerët e politikës dhe të institucioneve në Shqipëri.
Ndonëse nuk ka një axhendë të publikuar të takimeve të zyrtarit të lartë të Shteteve të Bashkuara të Amerikës, mësohet se ai takimin e parë do ta zhvillojë me Kryeministrin Edi Rama.
Dita e sotme e zyrtarit të lartë amerikan do të mbyllet vetëm me takimin me kreun e qeverisë. Ndërsa ditën e nesërme do të kulmojnë edhe takimet e tjera. Ai do të zhvillojë një takim me Presidentin e vendit, Ilir Meta.
Takimet e zyrtarit amerikan do të vijojnë më pas me dy kryetarët e partive opozitare më të mëdha në vend. Fillimisht, ai do të takohet me Lulzim Bashan ku pritet të shohë edhe qëndrimin e tij mbi krizën politike dhe më pas po në një takim të veçantë me kryetaren e Lëvizjes Socialiste për Integrim, Monika Kryemadhi.
Kjo vizitë e zyrtarit të lartë amerikan pritet që të mbyllet me një deklaratë të tij mbi krizën politike dhe zgjidhjen e saj, pasi do të zhvillojë edhe një takim me një grup gazetarësh shqiptar.
Kjo është vizita e parë e një ndërkombëtari të nivelit të lartë që vjen në Shqipëri për të biseduar për kapërcimin e krizës politike që prej dy muajsh ka kulmuar me djegien e mandateve parlamentare nga Partia Demokratike dhe nga Lëvizja Socialiste për Integrim.
