KQZ i jep mandatin edhe tre deputetëve të tjerë të LSI-së, partia e Kryemadhit me 11 ligjvënës në Kuvend…

Komisioni Qendror i Zgjedhjeve pritet t’u japë sot mandatin e deputetit tre kandidatëve të Lëvizjes Socialiste për Integrim, që kanë paraqitur pranë KQZ-së formularin e dekri.minalizimit. Zyra e shtypit e KQZ-së njoftoi dje se ditën e sotme do të zhvillohet mbledhja e radhës së institucionit, ku ndër të tjera, në rendin e ditës kishte edhe dhënien e mandateve të deputetit për tre kandidatë të LSI-së. Bëhet fjalë për Ralf Gjonin, i cili do të zëvendësoje mandatin e dorëhequr të Klajda Gjoshës.

Krahas tij, kandidati tjetër që pritet të marrë sot mandatin e deputetit është edhe Nimet Musai. Ditën e djeshme, Musai dha dorëheqjen nga posti i anëtarit të Këshillit Bashkiak të Fierit, detyrë të cilën e ka mbajtur që nga viti 2015. “Dua të vlerësoj dhe të respektoj të gjithë kolegët e LSI-së në Këshill për qëndrimin korrekt që kanë pasur. Në Parlament do të jem ai që jam këtu në Këshill. Do të jem një qytetar që do të punojë jo vetëm për qytetin e Fierit, por do të jap kontributin tim për gjithçka që e meriton vendi ynë, Shqipëria”, tha Musai dje pas dorëheqjes nga detyra e kryetarit të grupit të këshilltarëve të LSI-së në Bashkinë e Fierit.


Mandatin e dorëhequr të ish-deputetit të Lëvizjes Socialiste për Integrim në Qarkun e Vlorës, Shezai Rrokaj, pritet ta marrë kandidatja Enada Koçiraj, e cila ditën e djeshme iu drejtua Komisionit Qendror të Zgjedhjeve për të dorëzuar formularin e dekriminalizimit, i cili është hapi ligjor që autorizon institucionin për t’i dhënë mandatin e deputetit. Kërkesën e Koçirajt KQZ e administroi në mënyrë të menjëhershme, duke e futur për diskutim në rendin e ditës së sotme.

Koçiarj ishte e treta në listën e LSI-së për Qarkun e Vlorës. Ajo vjen nga radhët forumit rinor të LSI-së, forum në të cilin ka edhe postin e kryetares për Vlorën. Në CV-në e dorëzuar në KQZ për zgjedhjet e vitit 2017, theksohet se Koçiraj është e datëlindjes 1994 dhe ka mbaruar studimet e ciklit 3- vjeçar në Universitetin e Tiranës në Fakultetin Juridik. Ajo ka shënuar se nuk ka eksperienca pune, duke e filluar karrierën e saj në borderonë shtetërore si deputete.

Procedura ligjore parashikon se pas miratimit të dhënies së mandatit të deputetes nga ana e Komisionit Qendror të Zgjedhjeve, vendimet i përcillen për miratim Kuvendit të Shqipërisë. Kësisoj, pritet që para zhvillimit të seancës plenare që është parashikuar ditën e enjte, të mblidhet Këshilli për Rregulloren, Mandatet dhe Imunitetin ku parashikohet që të jepet drita jeshile për betimin e deputetëve të rinj në seancë plenare. Me miratimin e 3 kandidatëve, numri i deputetëve të rinj që futen në Parlament shkon në 13.

Me marrjen e mandateve të deputetit të tre kandidatëve të LSI-së, numri i deputetëve nga Lëvizja Socialiste për Integrim ua kalon atyre të PD-së. Kjo, pasi nga lista e LSI-së ka pasur më shumë kandidatë që kanë pranuar të marrin mandatin e deputetit, duke e çuar numrin e tyre në 10. Këtij numri i shtohet edhe mandati i Lefter Kokës, i cili që në fillim nuk pranoi të jepte dorëheqjen nga mandati, duke e çuar numrin total në 11. Ndërsa Partia Demokratike ka në Parlament 5 deputetë, tre që kanë pranuar të marrin mandatin dhe dy deputetët Rudina Hajdari dhe Myslym Murrizi, që nuk dhanë dorëheqjen.