Filloi me 2 milion, u bënë 3 më pas 8 por nuk kaluan 10 milion euro. Kaq është shuma maksimale që qarkullon jozyrtarisht. Për sa kohë policia, TIA apo vetë bankat e dëmtuara nuk do të deklarojnë dëmin që iu shkaktua nga grabitja në Rinas në “barkun” e avionit “Austrian Airlines”.
Nuk ishte hera e parë që ndodhte dhe fatkeqësisht, duhet thënë se vështirë të jetë e fundit. Sepse ka ndodhur disa herë në Rinas apo në rrugën drejt Rinasit, madje edhe brenda perimetrit të zonës që mund të konsiderohet (teorikisht) më e sigurta në vend. Aq më shumë kur do të kemi jo një por tre perimetra pët të garantuar, veç Tiranës, edhe në Kukës dhe Vlorë.
Sot, kur është mësuar se ka vetëm një viktimë dhe nga rradhët e grabitësve, të gjithë komentojnë shumën e parave, gjetjen e tyre dhe pjestarëve të bandës. Sipas gjasave, nuk do të gjenden, ashtu siç edhe paratë që edhe në grabitjet e tjera, nuk u gjetën kurrë.
Po flitet edhe për sigurinë. Policia e Ministri i Brendshëm ia hedhin fajin konçesionarit kinez të Aeroportit Ndërkombëtar të Tiranës- TIA. Nga ana tjetër, TIA thotë se ka zbatuar të gjitha procedurat e sigurisë, duke nxjerrë gënjeshtar edhe vetë ministrin Lleshaj me deklaratat e tij.
Sot po flitet për marrje nën kontroll nga ushtria të sigurisë së TIA-s. Presidenti e quan cënim serioz të sigurisë kombëtare. E në fakt, në një vend normal kështu duhet të jetë. Pak para grabistjes spektakolare- tragjike, në Rinas u ul me avion Ilir Meta dhe iku nga Shqipëria po përmes ajrit Edi Rama.
Kompania “Austrian Airlines” ka thënë se nuk do të lejojë më transport të vlerave monetare me avionët e saj nga Rinasi. Situata duket drejt përmirësimit të pashmangshëm, për kushtet e sigurisë e për minimizimin e riskut, meqenëse të paktën një kompani, sipas gjasave edhe të tjera, nuk do të sjellin apo nxjerrin vlera të mëdha monetare nga Shqipëria përmes Rinasit.
Çdo e keqe e ka një të mirë, thotë populli. Edhe grabitja në Rinas e 10 milionëve, e ka një. Për të disatën herë, nga Rinasi apo rrethinat e tij vjen lajmi i mirë se Zoti i do shumë shqiptarët. Duket si lojë fjalësh, por pikërisht nga vendi ku të paktën përkohësisht ngjitemi drej qiellit, vjen rikonfirmimi për dashurinë e pamatë të Zotit për racën tonë.
Mund të kenë humbur dhjetra- qindra miliona euro apo dollarë nga grabitjet, por asnjë shqiptar nuk është cënuar, dhunuar, plagosur apo vrarë nga autorët jo të paktë të veprave. E mos harroni, vetëm në rastin e fundit, të hipur në avion gati për nisje, kanë qenë të paktën 160 pasagjerë, vetëm disa metra larg 4 grabitësve.
Nga ana tjetër, pavarësisht se jemi shtet i NATO-s, në zemër të Europës dhe ku shteti nga feja është e ndarë me ligj, mesa duket askush nga ata të tmerrojnë Europën e Botën, nuk i shohin lajmet tona ose nuk u kap antena valët e mediave shqiptare. Urojmë që as kësaj here, pavarësisht se grabitja është më spektakolare, ata që kanë mbetur nga ISIS, të mos shohin lajme…
A nuk na do Zoti shumë ne shqiptarëve…?! /Shënim i ShkodraWeb/
